حسین محتشم
پونچھ//سرحدی ضلع پونچھ صدر مقام پر نئی بستی میں پانی کا ہینڈ پمپ عرصہ دراز سے خراب پڑا ہوا ہے جس کی وجہ سے وہاں کے مقامی لوگ انتظامیہ سے برہمی کا اظہار کر رہے ہیں۔بتا دیں کہ نئی بستی پونچھ کی ایک ایسا علاقہ ہے جہاں صفائی کرم چاریوں کی اکثریت ہے۔ان لوگوں کی جانب سے ایک احتجاجی مظاہرہ کیا گیا جس کی قیادت انل کمار نامی ایک بزرگ شخص کر رہے تھے، جنہوں نے ذرائع ابلاغ کے نمائندگان کے ساتھ بات کرتے ہوئے کہا کہ عرصہ دراز سے ہینڈ پمپ خراب ہونے کی وجہ سے ان کو پانی کی قلت کا سامنا ہے۔ انہوں نے کہا کہ نل کے ذریعے جو پانی آتا ہے اسے وہ پینے کے لیے استعمال نہیں کرتے،اکثر لوگ ہینڈ پمپ کا ہی پانی پینا پسند کرتے ہیں جو کافی عرصہ سے خراب پڑا ہے۔انہوں نے کہا کہ بستی کے لوگوں کی جانب سے کئی بار متعلقہ محکمہ کے افسران کو اطلاع بھی کی گئی ہے اور توجہ بھی دلائی گئی ہے کہ اس ہینڈ پمپ کی مرمت کروائی جائے لیکن اس طرف کوئی متوجہ نہیں ہو رہا ہے۔انہوں نے مزید کہا کہ ان کی سنوائی نہیں ہو رہی ہے اسی لیے ان کو مجبوراً یہ احتجاجی مظاہرہ کرنا پڑ رہا ہے۔انہوں نے ضلع ترقیاتی کمشنر پونچھ سے مداخلت کر کے ہینڈ پمپ کی جلد سے جلدی مرمت کروانے کی اپیل کی۔
