پولیس پرامن انتخابات کیلئے پرعزم : آئی جی پی

عظمیٰ نیوز سروس
سرینگر //انسپکٹر جنرل آف پولیس(آئی جی پی)کشمیر زون ودھی کمار بردھی نے اتوار کو کہا کہ وادی کشمیر میں لوک سبھا عام انتخابات کے ہموار انعقاد کے لیے تمام ضروری انتظامات کئے جا رہے ہیں۔ انہوں نے کہا کہ پولیس انتظامیہ ،کشمیر صوبے میں لوک سبھا انتخابات کے پرامن انعقاد کے لیے پرعزم ہے۔انہوں نے کہا کہ تمام ضلعی ایس پیز کو جمہوریت کے جاری تہوار کو کامیاب بنانے کے لیے سخت ہدایات دی گئی ہیں۔ آئی جی پی کشمیر نے کہا”محکمہ پولیس کو تیار کیا گیا ہے، وادی کشمیر میں آزادانہ اور منصفانہ لوک سبھا انتخابات کے لیے تمام ضروری انتظامات کیے جا رہے ہیں، ضلع ایس پیز کو بھی مشتبہ اور ملک دشمن عناصر پر کڑی نظر رکھنے کو یقینی بنانے کے لیے سخت ہدایات دی گئی ہیں تاکہ ان کے مذموم منصوبے کامیاب نہ ہوں‘‘۔شمالی کشمیر کے ہتلنگا اوڑی میں دراندازی کی حالیہ کوشش پر آئی جی پی نے کہا کہ اس طرح کی دراندازی کی کوششیں دہشت گردوں کی طرف سے وقتاً فوقتا ًکی جاتی ہیں تاہم پولیس، فوج اور دیگر سیکورٹی ایجنسیاں پوری طاقت کے ساتھ ان کے مذموم منصوبے کو ناکام بنانے کے لیے چوکس رہتی ہیں۔آئی جی پی نے کہا، “پولیس، فوج اور دیگر سیکورٹی ایجنسیاں عام لوگوں کی زندگیوں کو محفوظ بنانے کے لیے پرعزم ہیں، اور دراندازوں کے منصوبوں کو ناکام بنانے کے لیے ہمہ وقت تیار ہیں۔”