پانچویں مرحلہ کی پولنگ آج

 نئی دہلی// لوک سبھا انتخابات کے پانچویں مرحلہ میں سات ریاستوں کی 51سیٹوں پر پیر کو ووٹ ڈالے جائیں گے ۔ اس مرحلہ میں کانگریس کے صدر راہل گاندھی، پارٹی کی سابق صدر سونیا گاندھی، مرکز ی وزیر راجناتھ سنگھ اور اسمرتی ایرانی سمیت کئی قدآور لیڈر میدان میں ہیں۔اس مرحلہ میں آٹھ کروڑ 75لاکھ 88ہزار 722رائے دہندگان 674امیدواروں کی قسمت کا فیصلہ کریں گے ۔ ان میں چار کروڑ 63لاکھ تین ہزار 342مرد، چار کروڑ 12لاکھ 83ہزار 166خواتین اور 2,214خواجہ سرا رائے دہندگان ہیں۔ ان کے لئے 96ہزار88پولنگ مراکز بنائے گئے ہیں۔ چلچلاتی گرمی کے باوجود انتخابی تشہیر میں امیدواروں اور ان کے حامیوں کا جوش قائم رہا۔وزیراعظم نریندر مودی، بھارتیہ جنتا پارٹی کے صدر امت شاہ، کانگریس کے صدر راہل گاندھی اور پارٹی کی جنرل سکریٹری پرینکا گاندھی واڈرا سمیت مختلف پارٹیوں کے لیڈروں نے انتخابی ریلیاں کی۔پیر کو پانچویں مرحلہ کے ختم ہونے کے ساتھ ہی لوک سبھا کی 425سیٹوں کے لئے پولنگ مکمل ہوجائے گی اور باقی دو مرحلوں میں 118سیٹوں کے لئے پولنگ باقی رہ جائے گی۔ اس طرح 17ویں لوک سبھا انتخابات کا تین چوتھائی سے زیادہ سفر مکمل ہوجائے گا۔ پانچویں مرحلہ کے 674امیدواروں میں کئی بڑے نام ہیں۔ کانگریس کے صدر راہل گاندھی اترپردیش کی امیٹھی سیٹ سے میدان میں ہیں۔ مرکزی وزیر اور بھارتیہ جنتا پارٹی کی امیدوار اسمرتی ایرانی سے ان کا سیدھا مقابلہ ہے ۔ اترپردیش کی لکھنو سیٹ سے وزیر داخلہ راجناتھ اپنی انتخابی قسمت آزما رہے ہیں۔ یہاں سماج وادی پارٹی کی پونم سنہا کھڑی ہیں جو بی جے پی چھوڑ کر کانگریس میں شامل ہوئے لیڈر اور اداکار شتروگھن سنہا کی بیوی ہیں۔اترپردیش کی ہی سرخیوں میں رہنے والی رائے بریلی سیٹ سے کانگریس کی سابق صدر سونیا گاندھی ایک بار پھر اپنی انتخابی قسمت آزما رہی ہیں۔ ان کے خلاف بی جے پی نے دنیش پرتاپ سنگھ کو ٹکٹ دیا ہے ۔پانچویں مرحلہ میں مرکزی وزیر راجیہ وردھن سنگھ راٹھوڑ بی جے پی کے ٹکٹ پراور چکا پھینک میں 2010میں دولت مشترکہ کھیلوں میں سونے کا تمغہ جینتے والی اور اولمپیئن کرشنا پونیا جے پور دیہی سے اپنی انتخابی قسمت آزما رہی ہیں۔ محترمہ پونیا اس وقت راجستھان کی سادلپور سیٹ سے رکن اسمبلی ہیں۔ مرکزی وزیر جیتن سنگھ جھارکھنڈ کی ہزاری باغ سیٹ سے اور ارجن رام میگھوال راجستھان کی بیکانیر سیٹ سے الیکشن لڑرہے ہیں۔جھارکھنڈ کے سابق و زیراعلی ارجن منڈا ریاست کی کھونٹی سیٹ سے ، سابق مرکزی وزیر راجیو پرتاپ روڈی بہار کی سارن سیٹ سے اور موجودہ رکن پارلیمان پرہلاد پٹیل مدھیہ پردیش کی داموہ سیٹ سے بی جے پی کے ٹکٹ پر کھڑے ہیں۔ مغربی بنگال کی بیرک پور سیٹ سے سابق مرکزی وزیر دنیش ترویدی اور شری رام پور سیٹ سے کلیان بنرجی ترنمول کانگریس کے ٹکٹ پر میدان میں ہیں۔اس مرحلہ میں اترپردیش کی 14، راجستھان کی 12، مغربی بنگال اور مدھیہ پردیش کی سات سات، بہار کی پانچ، جھارکھنڈ کی چار اور جموں و کشمیر کی اننت ناگ سمیت دو سیٹوں کیلئے پولنگ ہونی ہے ۔ اس کے ساتھ ہی اننت نات سیٹ پر پولنگ مکمل ہوجائے گی۔ یو این آئی