عظمیٰ مانیٹرنگ ڈیسک
واشنگٹن//نو منتخب امریکی صدر ڈونلڈ ٹرمپ نے تقریب حلف برداری کے انتظام کے لیے 17 کروڑ ڈالر سے زیادہ کی رقم جمع کر لی۔ یہ ایک ریکارڈ رقم ہے جس میں ٹیکنالوجی کمپنیوں کے سینئر ایگزیکٹو ڈائریکٹروں اور مرکزی عطیہ کنندگان نے اہم کردار ادا کیا۔ مہم کے اختتام تک ٹرمپ کمیٹی 20 کروڑ ڈالر سے زیادہ کی رقم اکٹھا کر سکتی ہے۔ ذرائع ابلاغ کے مطابق یہ نجی عطیات حلف برداری کی تقریب کے ضمن میں ہونے والی سرگرمیوں کے اخراجات کے لیے استعمال ہوتے ہیں۔ 4سال قبل صدر جو بائیڈن کی تقریب حلف برداری کے لیے 6.2 کروڑ ڈالر کی رقم جمع ہوئی تھی۔ادھریورپی یونین نے 20 جنوری کو عہدہ سنبھالنے کی تیاری میں ہونے والے امریکہ کے نو منتخب صدر ڈونلڈ ٹرمپ کے ساتھ مثبت بات چیت کے منتظر ہونے کا پیغام دیا ہے ۔یورپی یونین کمیشن کی صدر ارسولا وون در لین اور یورپی یونین کونسل کے صدر انتونیو کوستا نے ایکس اکاؤنٹس سے ایک ہی پیغام شیئر کیا۔20 جنوری کو دوسری بار صدارتی کرسی سنبھالنے والے ڈونلڈ ٹرمپ سے مخاطب ہوتے ہوئے یورپی یونین کے رہنماؤں نے کہا، “امریکہ ہمارے قریبی شراکت داروں میں سے ایک ہے اور ہم ٹرانس اٹلانٹک روابط کو مضبوط کرنے کے لیے پرعزم ہیں۔”مشترکہ پیغام میں کہا گیا ہے کہ “EU کے لیے ضروری ہے کہ یہ اپنی بنیادی جمہوری اقدار کا تحفظ کرتے ہوئے انہیں مزید مضبوطی دے ، اپنی معیشت کو مزید مسابقتی اور پائیدار بنائے ، عالمی شراکت داری کے نیٹ ورک کو وسعت دے اور ہماری سلامتی کے معاملات میں مزید سرمایہ کاری کرے ۔”پیغام میں کہا گیا ہے کہ “ہم اپنی مشترکہ اقدار اور مشترکہ مفادات کی بنیاد پر آنے والی امریکی انتظامیہ کے ساتھ مثبت روابط کے منتظر ہیں۔ ایک چیلنجنگ دنیا میں، یورپ اور امریکہ اتحاد قائم کرتے ہی مضبوط ہیں۔”امریکہ میں ٹرمپ کے پہلے مدت صدارت (2017-2021) میں یورپی یونین کے رکن ممالک اور امریکہ کے درمیان شدید تناؤ دیکھا گیا تھا۔
