عظمیٰ سپورٹس ڈیسک
نئی دہلی// ہندوستانی کرکٹ ٹیم طوفان تھمنے کے بعد بارباڈوس سے وطن کیلئے روانہ ہو گئی ہے۔ ہفتہ کو T20 ورلڈ کپ جیتنے والی ٹیم انڈیا چار دن کے طویل انتظار کے بعد برج ٹاؤن سے ہندوستان کے لیے روانہ ہوئی ہے۔ روہت شرما کی قیادت میں ورلڈ چیمپئن بننے والی ہندوستانی ٹیم جمعرات کی صبح 6 بجے دہلی پہنچے گی۔ ٹیم کے کھلاڑی اور عملہ ہوائی اڈے سے براہ راست آئی ٹی سی موریا ہوٹل جائیں گے۔ اس کے بعد کھلاڑی وزیراعظم مودی سے ملاقات کریں گے۔چیمپئن کھلاڑی صبح 11 بجے وزیر اعظم کی آفس میں وزیر اعظم نریندر مودی سے ملاقات کریں گے۔
ٹی -20 ورلڈ کپ جیت کر وطن واپس آرہی ہندوستانی کرکٹ ٹیم کے وزیر اعظم کی رہائش گاہ پر شاندار استقبال کے بعد ہندوستانی کرکٹ کنٹرول بورڈ (بی سی سی آئی) نے ممبئی میں وجے یاترا کی تیاری کی ہے ۔ بورڈ آف کنٹرول فار کرکٹ ان انڈیا کے سکریٹری جئے شاہ نے ایک سوشل پوسٹ میں کہا، “ٹیم انڈیا کے اعزاز میں وکٹری پریڈ میں ہمارے ساتھ شامل ہوں اور جمعرات کو شام 5 بجے میرین ڈرائیو اور وانکھیڑے میں ہمارے ساتھ جشن منائیں۔” میڈیا سے بات چیت کرتے ہوئے بی سی سی آئی کے سینئر نائب صدر راجیو شکلا نے ٹیم کی وطن واپسی کی شاندار تیاریوں کے بارے میں معلومات شیئر کرتے ہوئے کہا، ہم نے کوئی کسر نہیں چھوڑی ہے ۔ طوفان کی وجہ سے چار دن تک پھنسے رہنے کے بعد ٹیم کو خصوصی طیارے کے ذریعے واپس لایا جا رہا ہے ۔ ہم ان صحافیوں کو بھی واپس لا رہے ہیں جو تقریب کی کوریج کے لیے وہاں گئے تھے ۔ راجیو شکلا نے کہا کہ طیارہ 4 جولائی کی صبح 6 بجے دہلی پہنچے گا۔ صبح 11 بجے وزیراعظم کی رہائش گاہ پر شاندار استقبالیہ کا اہتمام کیا جائے گا۔ جہاں کھلاڑی وزیر اعظم مودی سے ملاقات کریں گے ۔ اس کے بعد ممبئی پہنچ کر چمپئن ٹیم نریمن پوائنٹ سے وانکھیڑے اسٹیڈیم تک کھلی بس روڈ شو میں پریڈ کرے گی۔ انہوں نے کہا کہ جیتنے والی ٹیم کے لیے ایک شاندار پروقار تقریب ہوگی اور اس تاریخی کارنامے پر ٹیم کو 125 کروڑ روپے کی انعامی رقم سے نوازا جائے گا۔ انہوں نے کہا کہ اگرچہ اس بار روڈ شو نسبتاً چھوٹا ہو گا، جو صرف ایک کلومیٹر پر محیط ہو گا، لیکن یہ ہمارے لیے بڑے فخر اور خوشی کی بات ہے کہ ورلڈ کپ 12 سال کے طویل وقفے کے بعد بالآخر گھر آ رہا ہے ۔بھارتی بورڈ نے 20 سے زائد صحافیوں کو بھی چارٹرڈ فلائٹ سے وطن روانگی کی پیشکش کی تھی اور وہ بھی اسی پرواز کے ذریعے کھلاڑیوں کے ہمراہ بھارت واپس آ رہے ہیں۔بلیو شرٹس سے پہلے سے طے شدہ شیڈول کے مطابق پیر کے روز نیویارک روانہ ہونا تھا جہاں سے انہیں بھارت واپس پہنچنا تھا۔تاہم سمندری طوفان نے ٹیم کی واپسی میں رخنہ ڈالا، جس کے باعث بی سی سی ا?ئی نے چارٹرڈ طیارہ ویسٹ انڈیز بھیجا اور ٹیم براہ راست اپنے وطن پہنچے گی۔
