یو این آئی
نئی دہلی// پرسار بھارتی نے لوک سبھا انتخابات کی گنتی کے دن منگل کو دور درشن اور آل انڈیا ریڈیو پر طویل ترین اور تفصیلی ٹیلی کاسٹ کا اہتمام کیا ہے اطلاعات و نشریات کے سکریٹری سنجے جاجو، پرسار بھارتی کے چیٔرمین نونیت سہگل اور پرسار بھارتی کے چیف ایگزیکٹیو آفیسر گورو دویدی نے نامہ نگاروں کو بتایا کہ ووٹوں کی گنتی مکمل ہونے کے بعد یہ ٹیلی کاسٹ صبح 6 بجے سے دور درشن اور صبح 7 بجے سے آل انڈیا ریڈیو پر ووٹ کی گنتی کے اختتام تک جاری رہے گا۔ تمام ریاستی دارالحکومتوں اور ملک کے کچھ دوسرے بڑے شہروں کے ساتھ لائیو لنک برقرار رکھا جائے گا اور ووٹوں کی گنتی کی تازہ ترین صورتحال معلوم کی جائے گی۔ سہگل نے کہا کہ پرسار بھارتی کے ہیڈکوارٹر کے باہر لاؤڈ اسپیکر لگائے جائیں گے جس میں آل انڈیا ریڈیو سے نشر ہونے والی ووٹوں کی گنتی نشر کی جائے گی اور لوگوں کو پتہ چل جائے گا کہ کون جیتا اور کون ہارا۔ دویدی نے کہا کہ ٹی۔ٹوئنٹی ورلڈ کپ کرکٹ کے تمام ہندوستانی میچز (2 جون سے 29 جون تک) اور سیمی فائنل اور فائنل میچز دور درشن کے اسپورٹس چینل پر براہ راست نشر کیے جائیں گے۔ اس کے علاوہ 26 جولائی سے پیرس اولمپک گیمز 2024، 28 اگست سے پیرس پیرا اولمپک گیمز، 6 جولائی سے انڈیا زمبابوے انٹرنیشنل کرکٹ سیریز، 27 جولائی سے انڈیا سری لنکا انٹرنیشنل کرکٹ سیریز، فرنچ اوپن اور ومبلڈن ٹینس ٹورنامنٹ بھی نشر کیے جائیں گے۔
ایک دن قبل نتیش کی مودی سے ملاقات
یو این آئی
نئی دہلی//ملک میں اٹھارویں لوک سبھا کے انتخابات مکمل ہونے کے بعد اور ووٹوں کی گنتی سے ایک دن قبل قومی جمہوری اتحاد (این ڈی اے) کے ایک اہم اتحادی جنتا دل (یو) کے سربراہ اور بہار کے وزیر اعلیٰ نتیش کمار نے پیر کو یہاں وزیر اعظم نریندر مودی سے ملاقات کی۔ کمار اپنے دو روزہ دورے پر دارالحکومت دہلی پہنچے ہیں اور وزیر اعظم سے ملاقات کے بعد شام کو وہ وزیر داخلہ امت شاہ سے ملاقات کرنے والے ہیں۔لوک سبھا انتخابات کے ایگزٹ پول کے اندازوں کے بعد وزیر اعظم کی رہائش گاہ پر ہونے والی کمار کی ملاقات کے بارے میں سرکاری طور پر کچھ نہیں کہا گیا ہے، لیکن ماہرین اس ملاقات کو بہت اہم مان رہے ہیں اور اس سے کئی معنی نکال رہے ہیں۔ سمجھا جاتا ہے کہ دونوں لیڈروں نے انتخابات اور ان کے اندازوں کے بارے میں بات کی۔ اس کے علاوہ انہوں نے مرکز میں این ڈی اے حکومت کی تشکیل کی صورت میں مستقبل کی حکمت عملی پر بھی تبادلہ خیال کیا۔ایگزٹ پولز نے دکھایا ہے کہ بہار میں این ڈی اے کی پوزیشن اتنی مضبوط نہیں ہے جتنی کہ انتخابات کے آغاز سے پہلے توقع کی جارہی تھی۔
