وزیر دفاع کا دورہ ریاست آج

نئی دہلی // وزیر دفاع راجناتھ سنگھ، وزارت دفاع کا قلمدان سنبھالنے کے بعد پہلی بار ریاست جموں و کشمیر کا آج ایک روزہ دورہ کررہے ہیں۔وزیر دفاع سیاچن کا دورہ کرنے کے علاوہ لائن آف کنٹرول کی صورتحال اور وادی میں جنگجو مخالف آپریشنوں کے بارے میں جانکاری حاصل کریں گے۔راجناتھ سنگھ آج سیاچن جائیں گے۔انکے ہمراہ فوجی سربراہ جنرل بپن راوت بھی ہونگے۔ سیاچن کے علاوہ وزیر دفاع لیہہ میں 14ویں کور اور سرینگر میں 15ویں کور ہیڈکوارٹروں کا دورہ بھی کریں گے۔سرکاری ذرائع کا کہنا ہے کہ فوج کے اعلیٰ افسران راجناتھ سنگھ کو پاکستان کیساتھ لگنے والی لائن آف کنٹرول کی مجموعی صورتحال کے بارے میں آگاہ کریں گے نیز کشمیر میں ملی ٹینسی آپریشنوں کے بارے میں تفصیلات کی جانکاری دیں گے۔راجناتھ سنگھ پہلے لیہہ پہنچے گے اور پھر سیاچن میں فیلڈ کمانڈروں کیساتھ آپریشنل تیاریوں کے بارے میں تبادلہ خیال کریں گے۔وہ فوجی جوانوں کیساتھ بھی بات چیت کرنے والے ہیں۔سیاچن دنیا کا بلند ترین میدان جنگ ہے جہاں منفی درجہ حرارت 60ڈگری تک جاتا ہے۔سرکاری اعدادوشمار کے مطابق بھارت نے گذشتہ 10برسوں میں سیاچن کے میدان میں 163اہلکاروں کو کھو دیا ہے۔سیاچن پر بھارت اور پاکستان نے 1984میں فوج بھیجی تھی۔ذرائع نے بتایا کہ وزیر دفاع کو  پاکستان کی طرف سے کسی بھی مہم جوئی کے جواب میں بھارت کی آپریشنل تیاریوں کے بارے میں پرزنٹیشن دی جائیگی۔یاد رہے 14ویں کور چین  اور پاکستان کیساتھ لگنے والی سرحد پر مامور ہے، جبکہ 15ویں کور کشمیر میں ملی ٹینسی آپریشنز پر توجہ دے رہی ہے۔وزیر دفاع کا دورہ صرف ایک روز کا ہے اور وہ پیر کو ہی واپس نئی دہلی روانہ ہونگے۔