بلال فرقانی
سرینگر// بی جے پی نے کہا ہے کہ مرکزی وزیر داخلہ امیت شاہ کے دورہ کا مقصد جموں کشمیر میں اسمبلی انتخابات کی مہم کا آغاز نہیں۔بھاجپا کا کہنا ہے کہ مرکزی وزیر داخلہ امیت شاہ 30 ستمبر سے جموں و کشمیر کے 3 روزہ دورے پر ہوں گے, جہاں وہ ویشنو دیوی پر حاضری دینے، 2عوامی ریلیوں سے خطاب کرنے اور ترقیاتی سرگرمیوں کا جائزہ لینے کا منصوبہ بنایا گیا ہے۔ بی جے پی جنرل سکریٹری سنیل شرما نے ایک پریس کانفرنس میں کہا کہ اس دورے کو ابھی اعلان ہونے والے اسمبلی انتخابات سے نہیں جوڑا جانا چاہئے، حالانکہ ایک سینئر لیڈر نے نام ظاہر نہ کرنے کی شرط پر کہا کہ ” بی جے پی کی انتخابی مہم کیلئے ریلیوں کا آغاز ہو گا‘‘۔شرما نے بتایا “انتخابات الیکشن کمیشن آف انڈیا کا استحقاق ہے جو ایک خودمختار ادارہ ہے اور تاریخوں کا شیڈول اسی پر منحصر ہے‘‘۔ تاہم ان کا کہنا تھا’’بی جے پی تیار ہے، یہ (شاہ کا دورہ) معمول کا دورہ ہے اور اسے انتخابات سے جوڑنا درست نہیں ہے‘‘۔ انہوں نے کہا کہ شاہ 30 ستمبر کو جموں پہنچیں گے، یکم اکتوبر کو راجوری (جموں ڈویژن) میں ایک ریلی سے خطاب کریں گے اور اسی شام کشمیر کے لیے روانہ ہوں گے۔ وہ 2 اکتوبر کو صبح 11 بجے بارہمولہ ضلع میں ایک ریلی سے خطاب کریں گے۔ شاہ یکم اکتوبر کو ریلی سے خطاب کرنے سے پہلے ویشنو دیوی مندر پر حاضری دیں گے۔ریلیوں کے بارے میں بات کرتے ہوئے شرما نے کہا کہ پورے کشمیر کے لوگوں کو بی جے پی اور مرکزی حکومت سے بہت سی توقعات اور امیدیں ہیں۔انہوں نے کہا’’ہر شخص کو وزیر اعظم نریندر مودی کی حکومت پر بھروسہ ہے، اس یقین کو ایک شکل دینے کے لیے، ان توقعات کو پورا کرنے کے لیے، اور انتظامیہ کی ترقیاتی سرگرمیوں کا جائزہ لینے کے لیے، مرکزی وزیر 30 ستمبر کو پہنچیں گے‘‘ ۔انہوں نے کہا کہ کشمیر بھر سے بالخصوص شمالی کشمیر اور جنوبی کشمیر کے لوگ بھی ریلی میں شرکت کریں گے۔ شرما نے کہا کہ مرکزی وزیر مرکز کی طرف سے شروع کی گئی مختلف ترقیاتی سرگرمیوں کے بارے میں بات کریں گے۔ شرما نے مزید کہا، “وہ ترقیاتی محاذ پر مرکز کی طرف سے اٹھائے گئے نئے اقدامات کے بارے میں بھی بات کریں گے۔”بی جے پی لیڈر نے کہا کہ مرکزی وزیر داخلہ کا دورہ بی جے پی اور مرکزی حکومت میں لوگوں کے اعتماد کو مضبوط کرنے کے لئے ایک بڑا قدم ہوگا۔انہوں نے مزید کہا، ’’یہ ریلی کی شکل میں مرکزی وزیر داخلہ کا کشمیر کے لوگوں کے ساتھ براہ راست بات چیت ہوگی‘‘۔بی جے پی لیڈر نے کہا کہ کئی دیگر سرکاری مصروفیات ہوں گی ۔لیکن، جہاں تک پارٹی کے پروگراموں کا تعلق ہے، پارٹی لائنوں کے پار سے وفود، یا یہاں تک کہ کاروباری رہنما، دانشور، ان سے مل سکتے ہیں۔ پارٹی کی سرگرمیوں پر سینئر لیڈروں سے بھی تبادلہ خیال کیا جائے گا۔یہ پوچھے جانے پر کہ کیا شاہ یہاں شہر کے عیدگاہ علاقے میں مجوزہ کینسر اسپتال کا سنگ بنیاد رکھیں گے، شرما نے کہا کہ پارٹی کے پاس جو معلومات ہیں اس کے مطابق ترقیاتی سرگرمیوں پر ایک سیشن ہے۔انہوں نے کہا کہ شاید کینسر ہسپتال کا سنگ بنیاد بھی رکھا جائے گا اور دیگر ترقیاتی سرگرمیاں بھی ہوں گی۔ایک خبر رساں ایجنسی کے مطابق بی جے پی کے ایک لیڈر نے نام لیے بغیر کہا “وزیر داخلہ شاہ کا دو میگا عوامی ریلیوں سے خطاب مسلم اکثریتی اضلاع سے بی جے پی کی انتخابی مہم کا آغاز ہوگا۔ ” لیڈر نے بتایا، ’’راجوری اور بارہمولہ دونوں پہاڑی بولنے والے لوگوں کی ایک بڑی آبادی کا گھر ہیں جنہوں نے بی جے پی سے انہیں شیڈولڈ ٹرائب کا درجہ دینے کی بہت امیدیں وابستہ کر رکھی ہیں۔انہوں نے کہا کہ وزیر داخلہ پہاڑی برادری سے براہ راست بات کریں گے۔انہوں نے یہ بھی کہا کہ جموں و کشمیر کے بی جے پی صدر رویندر رینا کے آبائی شہر راجوری میں اپنی عوامی ریلی کے بعد ، وزیر داخلہ اسی دن (1 اکتوبر) جموں واپس آئیں گے اور جموںپونچھ شاہراہ کے ساتھ جموں-اکھنور فلائی اوور اور کئی دیگر کا افتتاح کریں گے۔ شام کو سرینگر روانہ ہونے سے پہلے وہ بی جے پی کے سینئر لیڈروں کی ایک میٹنگ کی صدارت کریں گے۔
