وادی کے مختلف علاقوں میں عزاداروں کے اجتماعات

سرینگر//انجمن شرعی شیعیان کے اہتمام سے ساتویں محرم کو بھی مجالس اور جلوس ہائے عزا کا سلسلہ جاری رہا۔تنظیم کے سربراہ آغا سید حسن  نے علم شریف کے ایک جلوس سے خطاب کیا جو  قدیمی امام باڑہ حسن آباد میں اختتام پذیر ہوا۔جلوس عزا میں نوحہ خوانی و مرثیہ خوانی کی صورت میں شہدائے کربلا کو خراج عقیدت ادا کیا گیا۔موصولہ بیان کے مطابق جن دیگر مقامات پر ساتویں محرم کو علم شریف کے جلوس برآمد کئے گئے ان میں گذرگنڈ، پاٹواو،جہامہ، کری پورہ، وتہ ماگام بیروہ، آستان پورہ چھترگام، سنزی پورہ چاڈورہ، سوٹھ کٹر باغ،یاگی پورہ ماگام، سونہ پاہ ،میرگنڈ، پارس آباد،بٹہ چک راجہ محلہ دندوسہ، گریند کلان، شالنہ، پائین محلہ گریند، لبرتل، علی پورہ چاڈورہ، ریشی پورہ بڈگام، گلشن علی شالیمار، کرالہ پورہ جڈی بل،جے کے پی سی سی ایگرو باغ سرینگر، آباد پورہ گامدو، بنہ محلہ نوگام، کاوپورہ اندرکوٹ، بونہ محلہ اندرکوٹ، گگلو محلہ زالپورہ، اوڑینہ، چھانہ محلہ پائین نوگام سوناواری، دیور ملہ پورہ دسلی پورہ پٹن بارہمولہ، اوروکھرون پلوامہ شامل ہیں۔آغا سید حسن نے شہادت حضرت امام حسینؑ کے مختلف گوشوں کی وضاحت کی۔انہوںنے تنظیم کے اراکین اور نوجوان رضاکاروں کا شکریہ ادا کیا جنہوںنے جلوس میں نظم و نسق قائم و دائم رکھنے میں گرانقدر خدمات انجام دیں۔ 

 

سرینگر//نیشنل کانفرنس صدر ڈاکٹر فاروق عبداﷲ نے یوم عاشورہ کے پیش نظر ریاست میں خصوصی اقدامات کرنے کی ضرورت کو اجاگر کرتے ہوئے انتظامیہ سے تاکید کی کہ وہ عوام کو بنیادی سہولیات میسر رکھنے کے ساتھ ساتھ شیعہ اکثریتی علاقوں میں خاص طور سے سڑکوں اور گلی کوچوں کی صفائی کے کام کو یقینی بنائیں۔ ڈاکٹر فاروق نے عزاداری جلوسوںکے دوران ہر اہم مقام پر طبی کیمپ قائم کرنے کی ضرورت پر زور دیتے ہوئے کہا کہ عزادارن کے ہمراہ خصوصی طبی خدمات بھی میسر رکھی جائیں۔انہوں نے انتظامیہ سے اپیل کی کہ عزاداران کو اپنے اپنے علاقوں میں جلوس نکالنے کی سہولیات فراہم کی جائیں اور یوم عاشورہ کی اختتامی تقریبات منعقد ہونے تک ہر ایسی سہولیت کو بر قرار رکھا جانا چاہیے۔اَدھر پارٹی لیڈر تنویر صادق نے محرم الحرام کے سلسلے میں کئے گئے انتظامات کو غیر تسلی بخش قرار دیتے کہا کہ محرم الحرام کے سلسلے میں حکومت کی طرف سے کئے گئے ناکافی ہیں۔

 

 سرینگر//محرم الحرام کے متبرک ایام کی مناسبت سے شیخ العالم ؒ ہال بڈگام میںصبر ورضاکے عنوان سے حسینی ادبی کانفرنس کا انعقاد کیا گیا۔تقریب کے دوران پروفیسر نذیر آزاد اورشفیع محمدمیر ایوانِ صدارت میں موجود تھے۔ تقریب میں حسینی ادب کے مختلف پہلوئوں پر سیر حاصل بحث و تمحیص ہوئی اورفلسفہ کربلا اور پیغامِ حسینی کے مختلف پہلوئوں کو اجاگر کیا گیا۔ مقررین نے کہا کہ اردو اور کشمیری ادب بھی ذکرِ حسین و شہدائے کربلا سے مالا مال ہے اور اس کا کسی قدر جائزہ لینے کے لئے اس کانفرنس کا انعقاد کیا گیا ہے۔ تقریب میں شفق سوپوری، نذیرا ٓزاد، شوکت شہباز، شہبازہا کباری، عبدالغنی نسیم، مجید مسرور،مشتاق شمیم، عبدالاحد واحد، مہنور سنگھ، علی محمد جو، سراج سنگھ سوراج، اور ایچ ایس پائی موجود تھے۔ تقریب کے آ خر پر توصیفی اسناد بھی تقسیم کی گئیں۔ 

 

سرینگر//کاروان اسلامی کے سربراہ مولانا غلام رسول حامی نے معرکہ کربلا کو ایک عظیم نمونہ عمل قرار دیتے ہوئے کہا کہ امام حسینؑ اور انکے جان نثاروں کی شہادت اور یزیدیت کا خاتمہ اس بات کی کھلی دلیل ہے کہ سچائی کی جیت اور برائی کی ہار نظام قدرت ہے لیکن اس کے لئے اپنی ذمہ داریوں کو نبھانے کی اشد ضرورت ہے۔مولانا حامی بانڈی پورہ میںمحبوب العالم گروپ آف ایجوکیشن کالج میں ایک سمینار سے خطاب کررہے تھے ۔ انہوں نے کہا کہ جہاں ایک طرف سرکاری مشینری ذلت اور ناسور کو جواز فراہم کر کے اس سرزمین کو برباد کیا جا رہا ہے وہیں ہمارے پاس عوامی بیداری مہم کیلئے سیرت مصطفیؐ سب سے بہترین ہتھیار ہے۔انہوں نے کہا کہ ضرورت اس بات کی ہے کہ اپنی آنے والی نسلوں کو دینی و دنیاوی علوم و فنون سے بہرہ ور کرنے کی سعی کی جائے تاکہ انسانیت کو ہم سے فائدہ پہنچے ۔