بلال فرقانی
سرینگر// دنیا کے مختلف حصوں کی طرح جموں وکشمیر میں بھی اتوارکے روز ولادت باسعادت کی مناسب سے تقریبات نہایت ہی عقیدت واحترام اور تزک و احتشام کے ساتھ منائی گئیں۔اس سلسلے میں جموں وکشمیر کے درجنوں مقامات سے جلوس برآمد ہونے کے علاوہ سینکڑوں مساجد، زیارت گاہوں، خانقاہوں اور امام بارگاہوں میںجشن میلاؐ کی خصوصی مجالس کا انعقاد کیا گیا۔ علمائے کرام اور ائمہ مساجد نے محسن کائنات کی زندگی کے مختلف گوشوں پر روشنی ڈالی جبکہ مساجد، زیارت گاہوں اور خانقاہوں میں رات بھر جاری رہنے والی پرنور اور پروقار شب خوانی کی تقریبات میںہزاروں کی تعداد میں لوگوعظ و تبلیغ، درودواذکار ، ختمات المعظمات اور نعت و منقبت میں محو رہے جبکہ دن کے دوران وادی کے اطراف و اکناف میں جشن میلاد کے عظیم الشان جلوس برآمد ہوئے جن میں ہزاروں لوگوں نے شرکت کی۔ جلوسوں کے راستوں پر جگہ جگہ مشروبات کا انتظام رکھا گیا تھا۔ اس
دن کی مناسبت سے سب سے بڑی تقریب آثار شریف درگاہ حضرت بل میں منعقد ہوئی جہاں وادی کے مختلف حصوں سے آئے ہوئے لوگوں نے شب خوانی کی روح پرور مجالس میں حصہ لیا۔درگاہ حضرت بل میںلوگ موئے مقدس کے دیدار سے بھی فیضیاب ہوئے۔یہاں نماز کے اجتماعات میں ہزاروں کی تعداد میں مرد وزن نے شرکت کی اور موئے پاک کا دیدار کیا۔ شب خوانی کی مجالس آثار شریف شہری کلاش پورہ، پنجورہ، صورہ، اہم شریف بانڈی پورہ،کعبہ مرگ اور دوسری عبادگاہوں میں بھی منعقد ہوئیں۔ وادی کے دیگر آستانوں، زیارت گاہوں اور مساجد میں بھی تقریبات کا انعقاد کیا گیا ۔ آثار شریف شہری کلاش پورہ، آثار شریف پنجورہ شوپیاں، آستان عالیہ جانب صاحب صورہ ، آستان عالیہ دستگیر صاحب خانیار اور سرائے بالا کے علاوہ کولگام، پلوامہ ، شوپیاںاور اننت ناگ ترال ، پانپور، بارہمولہ، سوپور،کپوارہ، بارہمولہ، ہندوارہ ، سوپور اور ٹنگمرگ، بانڈی پورہ، سمبل ،حاجن ،گاندبل، کنگن اور بڈگام، چاڑورہ، چرار شریف اور دیگر جگہوں میں بڑے بڑے اجتماعات منعقد کئے گئے۔ تواریخی جامع مسجد سرینگر میں بھی بہت بڑی تقریب منعقد ہوئی۔
جبکہ صوبہ جموں بالخصوص خطہ چناب و پیر پنچال اور خطہ لداخ کے لیہہ، کرگل اور دراس میں بھی جشن ولادتؐ کے ضمن میں منائی جانے والی خصوصی مجالس کا انعقاد کیا گیا اور جلوس برآمد ہوئے۔ انتظامیہ نے آثار شریف درگاہ حضرت بل میں زائرین کو ہر ممکن سہولیت پہنچانے کی غرض سے تمام انتظامات کئے تھے جن میں بلا خلل،بجلی ،پینے کا صاف پانی،طبی ،ٹرانسپورٹ ،صحت وصفائی کے علاوہ دیگر سہولیات شامل ہیں۔محکمہ امور صارفین و عوامی تقسیم کاری اور جموں وکشمیر بینک نے درگاہ حضرت میں زائرین کے لئے طعام کے معقول انتظامات کئے تھے۔عید میلادؐ کی مناسبت سے وادی میں اتوار کے روز درجنوں مقامات پر جلوس برآمد ہوئے۔جموں وکشمیر وقف بورڈ کی جانب سے درگاہ میں پہلی مرتبہ میلاد کا جلوس برآمد کیا گیا۔ انجمن شرعی شعیان کی جانب سے جڈی بل میں میلاد جلوس بر آمد کیا گیا۔تحریک دعوت منہاج الاسلام کے زیر اہتمام سے سرینگر کے مختلف علاقوں میں جلوس برآمد کئے گئے ۔ کاروانِ اسلامی نے بھی جلوس نکالا۔
