عظمیٰ نیوز سروس
سرینگر// بالی ووڈ اداکار اور سیاست دان راج ببر نے بدھ کے روز کہا کہ انہوں نے کبھی بھی کشمیر کو غیر محفوظ محسوس نہیں کیا، اپنے فلمی کیریئر کو تشکیل دینے کا سہرا وادی کو دیتے ہیں، اور سیاحوں اور فلم سازوں پر زور دیتے ہیں کہ وہ اس جگہ کا دورہ کریں جسے انہوں نے محبت، امن اور گرم جوشی کی سرزمین قرار دیا ہے۔گلمرگ میں نامہ نگاروں سے بات کرتے ہوئے، راج ببر نے کہا کہ کشمیر ان کے اداکاری کے کیریئر میں مرکزی حیثیت رکھتا تھا۔ انہوں نے کہا کہ “یہ وہ وادی ہے جہاں سے میں نے حقیقی معنوں میں شروعات کی تھی۔ 1980 سے 1996-97 تک، ایک بھی فلم ایسی نہیں تھی جس کی شوٹنگ میں نے کشمیر میں نہ کی ہو۔ ارمان ہو، آپ کی بات یا کوئی اور، کشمیر ہمیشہ میرے کام کا حصہ رہا ہے”،۔انہوں نے وادی کو محفوظ اور خوش آئند قرار دیا۔ انہوں نے کہا “میں نے کشمیر کو کبھی بھی غیر محفوظ یا دہشت زدہ محسوس نہیں کیا۔ یہاں کے لوگ آپ کو مسکراہٹ اور پیار سے خوش آمدید کہتے ہیں اور اس محبت میں کبھی کمی نہیں آئی”۔ انہوں نے کہا “کشمیریت کا مطلب یہی ہے،کشمیریت انسانیت کا دوسرا نام ہے”۔سیاحوں اور فلم سازوں سے دورہ کرنے کی اپیل کرتے ہوئے، ببر نے کہا کہ وادی کا ماحول پرامن ہے۔ “یہاں کوئی دہشت نہیں ہے۔ ہر کسی کو خود آنا چاہیے اور کشمیر کی خوبصورتی اور امن کو دیکھنا چاہیے۔ یہ سیاحت سے لے کر فلم کی شوٹنگ تک ہر چیز کے لیے موزوں ہے”۔انہوں نے مزید کہا کہ اس سے کوئی فرق نہیں پڑتا کہ کوئی جہاں بھی سفر کرے، کشمیر ہی آخری منزل ہے۔
