وادی میں درمیانی درجہ کی بارشیں آج بھی بارشوں کا امکان ، تودے گرنے کی بھی وارننگ

اشفاق سعید

سرینگر// محکمہ موسمیات کی پیش گوئی کے عین مطابق جمعہ کوبعددوپہر سرینگر سمیت کئی علاقوںمیں مطلع ابرآلودہونے کیساتھ ہی بارشوں کا سلسلہ شروع ہوگیا جبکہ کچھ علاقوںمیں تیزہوائیں چلنے کی بھی اطلاعات ہیں۔ ڈیزاسٹر مینجمنٹ اتھارٹی نے دس اضلاع میں برفانی تودے گرنے کی وارننگ جاری کی جبکہ محکمہ موسمیات نے باغات مالکان کومشورہ دیاہے کہ وہ ہفتہ کو بھی موسم خراب رہنے کی وجہ سے اپنے میوہ باغات میں کیڑے مار ادویات کاچھڑکائو نہ کریں۔جمعہ کی صبح محکمہ موسمیات نے ایک ایڈوئزری جاری کی ،جس میں کہاگیاکہ 24اور25مارچ کو جموں وکشمیر کے کچھ بالائی علاقوںمیں ہلکی برف باری کیساتھ ساتھ نچلے اورمیدانی علاقوں بشمول جموںمیں گرچ چمک کیساتھ بارش کاامکان ہے جبکہ کچھ علاقوںمیں وسیع پیمانے پر بارش ہوسکتی ہے۔محکمہ موسمیات نے ساتھ ہی خبردارکیاکہ جمعہ کودوپہر کے بعد گرج چمک کیساتھ تیز ہوائیں بھی چل سکتی ہیں اور کچھ علاقوںمیں ژالہ باری ہونے کابھی امکان ہے۔متعلقہ محکمے نے تاہم کہاکہ26سے 28مارچ تک جموںوکشمیرمیں موسم بنیادی طور پرخشک رہنے کاامکان ہے۔ جمعہ سہ پہر3بجکر15منٹ پر محکمہ موسمیات کے ڈپٹی ڈائریکٹر مختار احمد نے ایک ٹویٹ میں تازہ موسمی جانکاری فراہم کرتے ہوئے کہاکہ جموںوکشمیرمیں اگلے3سے5گھنٹوں کے دوران گرج چمک کے ساتھ ہلکی سے درمیانی بارش کا امکان ہے اور اس دوران جموں، ریاسی، ادھم پور، کٹھوعہ، سانبہ، بانہال،رام بن علاقے، جنوبی کشمیر اور وسطی کشمیر میں الگ تھلگ مقامات پر تیز ہوائوں اورژالہ باری کا بھی امکان ہے۔ موصوف ڈپٹی ڈائریکٹر کی اس موسمیاتی جانکاری کے تقریباً45منٹ بعدسری نگر اورشمالی کشمیر سمیت کچھ علاقوںمیں بونداباندی اور ہلکی بارشوں کا سلسلہ شروع ہوگیا۔اس دوران جمعہ کو دس اضلاع میں آئندہ 24 گھنٹوں میں اننت ناگ، بارہمولہ، گاندربل، کپواڑہ، کولگام، ڈوڈہ، کشتواڑ، پونچھ راجوری اور ریاسی اضلاع میںبرفانی تودے گرنے کی وارننگ جاری کی گئی۔