ایام عید کے دوران عوامی وفود،پارٹی لیڈران اور کارکنان کی ملاقات
سرینگر//نیشنل کانفرنس نے روز اول سے ہی عوام کو طاقت کا سرچشمہ سمجھا ہے اور ہمیشہ اس بات میں یقین رکھا ہے کہ سرداری عوام کا حق ہے اور یہ جماعت آج بھی اسی اصول پر چٹان کی طرح قائم و دائم ہے ۔ ان باتوں کا اظہار پارٹی کے نائب صدر عمر عبداللہ نے ایام عید کے دوران اپنی رہائش گاہ واقع گپکار روڑ پر عوامی وفود، عہدیداران اور کارکنان کے ساتھ ملاقات کے دوران کیا۔انہوں نے کہاکہ جموںوکشمیر کو اس وقت زبردست چیلنجوں ، مسائل اور مشکلات کا سامناہے ۔ بجلی اور پینے کے پانی کی سپلائی صورتحال پر بات کرتے ہوئے انہوں نے کہا کہ حکومت کی تمام تر توجہ سمارٹ میٹر نصب کرنے کی طرف مرکوز ہے جبکہ سپلائی پوزیشن بہتر کرنے کی طرف کوئی بھی توجہ نہیں دی جارہی ہے۔ انہوں نے کہا کہ موجودہ سپلائی پوزیشن میں سمارٹ میٹر نصب کرے کا کوئی جواز ہی نہیں بنتا آپ پہلے عوام کو 24گھنٹے بجلی اور پانی کی سپلائی یقینی بنائے پھر سمارٹ میٹر نصب کرنے کی بات کیجئے۔ عمر عبداللہ نے کہا کہ نیشنل کانفرنس ہمیشہ امن و آشتی، بھائی چارہ ، ریاست کی وحدت، انفرادیت اور شناخت قائم رکھنے میں تاریخی رول ادا کرتی رہی ہے ۔ انہوں نے کہا کہ نیشنل کانفرنس کو طرّہ امتیاز بھی حاصل رہا ہے کہ یہ جماعت واحد سیاسی اور عوامی نمائندہ جماعت رہی ہے اور اس جماعت کی عظیم جانی اور مالی قربانیوں کی بدولت یہاں کے عوام کے وہ حقوق حاصل ہوئے جن سے وہ صدیوں تک محروم تھے۔ انہوں نے مزید کہا کہ نیشنل کانفرنس ہر حال میں عوام کی نمائندگی کرتی رہے گی اور ہر ایک چیلنج کا ڈٹ کر مقابلہ کرے گی۔ جو لیڈران عمر عبداللہ سے ملاقی ہوئے اُن میں پارٹی جنرل سکریٹری علی محمد ساگر، عبدالرحیم راتھر، محمد شفیع اوڑی، میر سیف اللہ، تنویر صادق، شمیمہ فردوس، نذیر احمد خان گریزی، مبارک گل، حسنین مسعودی، شیخ محمد رفیع، پیر آفاق احمد، عمران نبی ڈار، الطاف احمد کلو، ایڈوکیٹ سیف الدین بٹ، مدثر شاہ میری، سارا حیات شاہ، انجینئر صبیہ قادری اور عفرا جان شامل ہیں۔
