عظمیٰ نیوز سروس
سرینگر//وزیر تعلیم سکینہ ایتو نے کہا ہے کہ نومبر کے وسط میں امتحانات میں شرکت کرنے والے طلبا کو نصاب میں نرمی ملے گی۔ یہ فیصلہ مارچ سے نومبر تک تعلیمی سیشن کی تبدیلی کے بعد آیا ہے، جس میں طلبا کو معمول سے پہلے امتحانات دینے ہونگے۔سکینہ ایتو نے موسم سرما کے زون میں برف باری کے امکان کو نومبر کے وسط میں امتحانات منعقد کرنے کی وجہ بتائی، بجائے اس کے کہ ان میں مزید تاخیر کی جائے۔ ابتدائی طور پر مارچ میں طے شدہ امتحانات اب نومبر کے وسط میں منعقد کیے جائیں گے۔ خدشات کو دور کرنے کے لیے وزیر نے یقین دلایا کہ طلبہ کے مسائل کو مدنظر رکھا جائے گا اور اسٹیک ہولڈرز سے مشاورت کے بعد 9ویں جماعت تک کے طلبہ کو نصاب میں نرمی فراہم کی جائے گی۔سکینہ ایتو نے بتایا، اس سے جموں و کشمیر میں طلباء اور والدین کے خدشات دور ہوں گے، نئے تعلیمی نظام الاوقات میں آسانی سے منتقلی کو یقینی بنایا جائے گا۔ تعلیمی کیلنڈر میں تبدیلی کی وجہ سے سکولوں نے پرائمری سطح تک داخلوں کے نوٹیفکیشن جاری کرنا شروع کر دیئے ہیں۔
