عظمیٰ نیوز سروس
سرینگر//جموں وکشمیر پولیس پبلک سکول بمنہ سرینگرمیں اقتصادی جرائم ونگ (کرائم برانچ کشمیر) کے زیر اہتمام 3 روزہ نئے فوجداری قوانین کی نمائش ہفتہ کو عوام کی بھر پور شرکت کے ساتھ اختتام پذیر ہوئی۔ نمائش کا افتتاح 11 ستمبر کو جموں و کشمیر کے لیفٹیننٹ گورنر منوج سنہانے کیا تھا۔ اقتصادی جرائم ونگ (کرائم برانچ کشمیر) کے زیر اہتمام اس نمائش کا مقصد ہندوستان کے نئے نافذ کردہ فوجداری قوانین کے بارے میں بیداری پھیلانا تھا۔ تقریب میں تین نئے قانون سازی کے بارے میں آگاہ کرنے پر توجہ مرکوز کی گئی جو کہ اصلاح شدہ فوجداری انصاف کے نظام کی ریڑھ کی ہڈی کی حیثیت رکھتے ہیں۔تین دنوں کے دوران لگ بھگ9000 افراد نے نمائش میں شرکت کی جن میں پہلے2 دن 5500 اور آخری دن 2500 شامل تھے۔ منتظمین نے کہا کہ بڑی شرکت نئے قانونی فریم ورک میں بڑھتی ہوئی عوامی دلچسپی کی عکاسی کرتی ہے۔منتظمین نے کہا کہ ایک انٹرایکٹو اور معلوماتی پلیٹ فارم کے طور پر ڈیزائن کیا گیا، اس نمائش نے قانونی خواندگی، شہری ذمہ داری، اور ان اصلاحات پر عوامی مکالمے کو فروغ دیا جو ہندوستان کے مجرمانہ انصاف کے نظام کی ازسرنو وضاحت کیلئے تیار ہیں۔اختتامی تقریب میں، انسپکٹر جنرل آف پولیس کرائم برانچ جموں وکشمیر سوجیت کمارآئی پی ایس نے بطور مہمان خصوصی شرکت کی۔ اپنے خطاب میں، انہوں نے فعال مشغولیت اور تعلیم کے ذریعے قانون نافذ کرنے والے اداروں اور عوام کے درمیان خلیج کو ختم کرنے کے اقدام کی تعریف کی۔اقتصادی جرائم ونگ (کرائم برانچ کشمیر) نے نمائش کو کامیاب بنانے میں پرجوش تعاون پر تمام شرکاء ، طلباء اور شہریوں کا شکریہ ادا کیا۔
