یو این آئی
پریاگ راج//پریاگ راج کے مہاکمبھ نگر کے سیکٹر 8میں پیر کو آگ لگنے سے کئی خیمے جل کر راکھ ہوگئے۔ کوئی جانی نقصان نہیں ہوا۔چیف فائر آفیسر پرمود شرما نے بتایا کہ سیکٹر 8 میں بجرنگ داس مارگ پر ایک خالی کیمپ میں آگ لگنے کی اطلاع ملتے ہی فائر بریگیڈ کی کئی گاڑیاں فورا موقع پر پہنچ گئیں اور آگ پر قابو پالیا۔ جائے حادثہ کو چاروں اطراف سے گھیرے میں لے لیا گیا تھا اور
لوگوں کو آس پاس کے علاقوں میں گھومنے پھرنے سے منع کر دیا گیا تھا۔انہوں نے کہا کہ عقیدت مند کیمپ خالی کرنے کے بعد چلے گئے تھے۔ آگ لگنے کی وجہ فوری طور پر معلوم نہیں ہو سکی۔قابل ذکر ہے کہ میلے کے علاقے میں 13جنوری کے بعد سے پانچویں بار آگ لگی ہے۔ حادثے میں کوئی جانی نقصان نہیں ہوا۔
یاتریوں کی بس کو حادثہ، 2 ہلاک، 18زخمی
یو این آئی
پریاگ راج//اتر پردیش میں پریاگ راج کے اتراو تھانہ علاقے میں گوہر پور قومی شاہراہ پر ایک ڈھابے کے قریب اتوار کی دیر رات پیش آئے ایک حادثے میں دو لوگوں کی موت ہو گئی اور 12سے زیادہ عقیدت مند زخمی ہو گئے۔پولیس ذرائع نے بتایا کہ پڑوسی ریاست بہار کے ضلع روہتاس سے 35عقیدتمندوں کو لے کر بس مہا کمبھ اسنان کیلئے پریاگ راج آ رہی تھی۔ اس دوران پریاگ راج کے اترانوو علاقے میں گوہر پور نیشنل ہائی وے پر یہ سڑک کنارے کھڑے ٹرالر سے پیچھے سے ٹکرا گئی۔ ایسا محسوس ہوتاہے کہ ڈرائیور کو نیند آنے کی وجہ سے یہ حادثہ پیش آیا ہے۔انہوں نے بتایا کہ زخمیوں کو اسپتال میں داخل کرایا گیا ہے۔ تمام زخمی دارا نگر تھانے کے نوہٹا، روہتاس، بہار کے رہنے والے ہیں۔ ڈرائیور اندھیرے کا فائدہ اٹھا کر فرار ہو گیا۔ پولیس رپورٹ درج کر لی گئی ہے۔
ریلوے سٹیشن پربھیڑ کوقابو کرنے کیلئے کئی اقدامات | کاونٹر سے پلیٹ فارم ٹکٹوں کو فروخت کرنے پر روک
عظمیٰ نیوز ڈیسک
نئی دہلی//دہلی میںگزشتہ روز ہوئی بھگدڑ کے بعد دہلی ریلوے اسٹیشن پر پلیٹ فارم ٹکٹوں کی کاونٹر سے فروخت بند کر دی گئی ہے۔ یہ حکم 26 فروری تک نافذ رہے گا۔ بتایا جا رہا ہے کہ بھگدڑ واقعہ کے بعد سے دہلی ریلوے اسٹیشن پر کوئی پلیٹ فارم ٹکٹ جاری نہیں کیا جا رہا ہے۔ ریل انتظامیہ کے ذریعہ اسٹیشن پر ہو رہی زبردست بھیڑ کو دیکھتے ہوئے یہ فیصلہ کیا گیا ہے۔اطلاع کے مطابق ریلوے انتظامیہ نے نئی دہلی ریلوے اسٹیشن پر پلیٹ فارم ٹکٹوں کی کاونٹر سے فروختگی کو 26 فروری تک روک لگا دی ہے۔ ساتھ ہی نئی دہلی اسٹیشن پر ریلوے کی طرف سے خاص انتظامات بھی کیے گئے ہیں۔ مسافروں کی سہولت کے لیے آر پی ایف اور ٹی ٹی کو ہر اینٹری پوائنٹ پر تعینات کیا گیا ہے۔ اس حکم کے بعد اب اگر آپ کے پاس جنرل ٹکٹ یا ریزرو ٹکٹ ہے تبھی آپ پلیٹ فارم پر جا سکتے ہیں۔اس سے قبل دہلی پولیس نے ریلوے اسٹیشن پر کراوڈ مینجمنت کے لیے اسنپکٹر رینک کے چھ افسروں کو تعینات کیا۔ یہ وہ افسر ہیں جنہیں این ڈی ایل ایس میں کام کرنے کا پہلے سے تجربہ ہے۔ ان میں سے کچھ افسر نئی دہلی ریلوے پولیس اٹیشن میں ایس ایچ او کے عہدے پر رہ چکے ہیں۔وہیں ہفتہ کی رات کو ہوئی بھگدڑ کی ابتدائی جانچ میں پتہ چلا تھا کہ نئی دہلی ریلوے اسٹیشن پر ہر گھنٹے ریلوے نے 1500 جنرل ٹکٹ فروخت کیے تھے۔ رپورٹ میں یہ بھی بتایا گیا ہے کہ ریلوے سیکوریٹی فورس (آر پی ایف)کے جوانوں کی تعیناتی متوازن نہیں تھی۔ جس سے بھیڑ کو قابو میں کرنے میں مشکل ہوٓئی اور اور حالات بگڑ گئے۔واضح ہو کہ ہفتہ کو دہلی ریلوے اسٹیشن پر زبردست بھگدڑ مچ گئی تھی۔ اس حادثہ میں 18 لوگوں کی جان چلی گئی تھی جبکہ کئی افراد شدید طور پر زخمی ہو گئے تھے۔
