حسین محتشم
پونچھ//انجمن خدام الحسین منگناڑ کی جانب سے سید الشہداء حضرت امام حسین اور دیگر شہدائے کربلا کی یاد میں مجلس عزاء و جلوس عزاء کا انعقاد کیا۔اس دوران مسجد فاطمہ الزہراء حیات پورہ منگناڑ سے گہوارہ شریف اور علم کا جلوس برآمد کیا۔ اس جلوس کے ہمراہ ماتمی انجمنوں اور سینکڑو ںعزاداروں نے بدیدہ ٔ نم ماتم کا نذرانہ پیش کیا۔جلوس عزاء امام بارگاہ عالیہ منگناڑ میں اختتام پزیر ہوا۔ جلوس کے علاوہ مسجد اور امام بارگاہ میں مجالس یاد حسینؑ شہدائے کربلا منعقد کی گئی۔مجالس کے دوران مولانا امان حیدر ہلوری، مولانا کرار حسین جعفری، مولا سجاد حیدر قمی نے خطاب کر کے معرکۂ حق و باطل کے حقیقی پیام سے نوجوان نسل کوآشنا کرواتے ہوئے انہیں سیرت امام حسینؑ کا مطالعہ کرنے اور اپنی زندگی میں سردار نوجوانان بہشت کے کردار کو پیدا کرنے کی تلقین کی۔ انہوں نے کہا معرکۂ کربلا جو کہ معرکۂ حق و باطل ہے اس میں حق پر رہنے والوں نے اپنی زندگیوں کو قربان کرتے ہوئے امت کے لئے تاریخ رقم کی اور اسلام کی تعلیمات کو مسخ کرنے کی کوشش کرنے والوں کے چہروں سے نقاب الٹایا ہے۔ انہوں نے کہاامت مسلمہ کے لئے نواسۂ رسولﷺ نے کربلا میں جام شہادت نوش کرتے ہوئے جو پیام دیا ہے وہ دراصل دنیا سے ظلم کے خاتمہ اور حق پر ڈٹے رہنے کے لئے دیا جانے والا لاثانی پیغام ہے اور اس پیغام پر عمل کرتے ہوئے دنیا بھر میں حق کی سربلندی اورپیام حق پر ڈٹے رہتے ہوئے اپنی جان عزیز کو قربان کردینا ہی حقیقت میں حسینی شعار ہے۔آخر میں انجمن خدام الحسین منگناڑ فیاض علی آرزو حیات پوری نے شرکاء جلوس عزاء اور پولیس اور ضلع انتظامیہ کا شکریہ ادا کیا۔
