عظمیٰ نیوز سروس
سرینگر// منشیات کے خلاف جنگ کو جاری رکھتے ہوئے پولیس نے شمالی کشمیر کے ضلع بارہمولہ کے گلی بل چندوسہ علاقے میں دو منشیات فروشوں کو گرفتار کرکے ان کی تحویل سے ممنوعہ مواد بر آمد کیا ہے۔ پولیس ترجمان نے اپنے ایک بیان میں تفصیلات فراہم کرتے ہوئے کہا کہ پولیس اسٹیشن چندوسہ کی ایک پارٹی نے گلی بل چندوسہ علاقے میں ایک ناکے کے دوران دو افراد کو روکا۔انہوں نے کہا کہ تلاشی کے دوران ان کی تحویل سے 36 گرام چرس جیسا مواد بر آمد کیا گیا جس کے بعد دونوں کو گرفتار کرکے پولیس اسٹیشن چندوسہ میں بند رکھا گیا۔بیان میں گرفتار شدگان کی شناخت عبدالقیوم لون ولد عبدالرحمان لون ساکن شر پورہ اور مدثر احمد ڈار ولد عبد الرشید ڈار ساکن ہیون شیری کے طور پر کی گئی ہے۔ قابل ذکر ہے کہ بارہمولہ پولیس نے ضلع میں سال رواں کے پہلے تین مہینوں کے دوران این ڈی پی ایس ایکٹ کے تحت 58 مقدمے درج کرکے 11 سخت گیر منشیات فروشوں سمیت 91 منشیات فروشوں کو گرفتار کیا ہے اور ان کی تحویل سے زائد از ایک کروڑ روپیے مالیت کا نشہ آور مواد بھی بر آمد کیا ہے۔ادھرسوپور میں تھانہ بومئی کی ایک پولیس پارٹی نے زونی پورہ کراسنگ تجر شریف پر ناکہ پر ایک شخص کو گرفتار کیا۔ دوران تلاشی اس کے قبضے سے 560 گرام چرس جیسی مادہ برآمد ہوئی۔ اس کی شناخت عرفان احمد پیر عرف بٹ پیر ولد محمد سلطان پیر ساکنہ تجر شریف سوپور کے طور پر ہے۔ اسی طرح سے کولگام میں بھی پولیس تھانہ کولگام کی ایک پولیس پارٹی نے ہدیگام میں گشت کے دوران ایک مشکوک شخص کو روکا جس کی شناخت فاروق احمد ٹھوکر ولد گل محمد ٹھوکر ساکن ہدیگام کے طور پر کی گئی۔ اس کی ذاتی تلاشی کے بعد تقریباً 700 گرام چرس جیسے ممنوعہ مادہ برآمد ہوا۔ اسے گرفتار کرکے پولیس اسٹیشن کولگام منتقل کردیا گیا ہے
