مسرت عالم بٹ کی عدالت حاضری

سرینگر// محبوس قائد وچیرمین مسلم لیگ جموں کشمیر مسرت عالم بٹ کو کورٹ بلوال جیل جموں سے سرینگر لایا گیا جہاں انھیں پولیس کی طرف سے عائد کئے گئے ایف آئی آر کے تحت کورٹ میں 4ایڈشینل سیشن جج کے سامنے پیش کیا گیا ۔ دلائل سننے کے بعد جج موصوف نے اس کیس کی اگلی سماعت /۵۱مارچ 2018ء کو رکھی جس کے ساتھ ہی مسرت عالم بٹ کو پولیس حصارمیں واپس کورٹ بلوال جیل منتقل کیا گیا۔لیگ ترجمان سجاد ایوبی نے اپنے بیان میں کہا کہ مسرت عالم کے تئیں پولیس اور انتظامیہ کی طرف سے روا رکھے جارہے اس سلوک کو دیکھ کر با آسانی یہ نتیجہ اخذ کیاجاسکتا ہے کہ ایک منصوبہ بند سازش کے تحت مسرت عالم بٹ کی سیاسی زمین تنگ کی جارہی ہے اور انھیں سیاسی صفحے سے ہٹانے کے لئے دلی سے لے کر سرینگر تک تمام کل پُرزے استعمال کئے جاتے ہیں ۔سجاد ایوبی نے کہا کہ ہم یہ واضح کرنا چاہتے ہیں کہ مسرت عالم بٹ کے تئیں پولیس اور انتظامیہ کا یہ ناروا سلوک نہ ہی مسرت عالم کے ارادوں کو کمزور کر سکتا ہے اور نہ ہی ان جھوٹ پر مبنی کہانیوں سے ان کے حوصلے مضمحل ہو سکتے ہیں ۔