عظمیٰ مانیٹرنگ ڈیسک
ماسکو// روس میں 30 مسافروں سے بھرے طیارے کو ایک پائلٹ نے غلطی سے ہوائی اڈے کے رن وے کے بجائے قریب ایک منجمد دریا پر اتار دیا۔ روس کے سوویت دور کے مسافر بردار طیارے اینٹونووف-24 کی منجمد دریا پر لینڈنگ سے مسافروں کی زندگی خطرے میں پڑ گئی۔ٹرانسپورٹ ایکسیڈنٹ پراسیکیوٹرز نے بتایا کہ پولر ایئرلائنز کا طیارہ یاکوتیا کے علاقے میں زیریانکا کے قریب دریائے کولیما پر بحفاظت اتر گیا۔ تمام مسافر بحفاظت ہیں۔ایئرلائن کمپنی کی جانب سے جاری بیان میں کہا گیا ہے کہ طیارے میں کسی قسم کی خرابی پیدا نہیں ہوئی تھی۔ طیارے کی منجمد دریا میں لینڈنگ پائلٹ کی غلطی تھی۔ایوی ایشن نے واقعے کی تحقیقات کے لیے انکوائری کمیٹی تشکیل دیدی۔ادھر امریکی ریاست کلیفورنیا کے شہرلاس اینجلس سے آنے والا ایک مساطر طیارہ بدھ کے روز لندن کے بین الاقوامی ہوائی اڈے ’ہیتھرو’ پر لینڈنگ سے قبل حادثے کا شکار ہونے سے بال بال بچا۔طیارے کی خوفناک لینڈنگ کی ویڈیو سوشل میڈیا پر وائرل ہو رہی ہے جس میں دیکھا جا سکتا ہے کہ جہاز رن وے پر اترنے سے قبل لڑ کھڑا گیا اور اس کا توازن بگڑ گیا۔ تاہم لینڈنگ کے آخری لمحات میں پائلٹ نے اس طرح سے رد عمل کا اظہار کیا جس سے طیارے کا توازن بہتر ہوگیا۔ اس کے ساتھ سامنے کا لینڈنگ گیئر طاقت کے ساتھ نیچے اترا جس سے طیارہ ایک جھٹکے سے نیچے آنے کے ساتھ اس کا اگلا حصہ اوپر اٹھ گیا۔
