مزید خبریں

وحیدپرہ کورہا کرنے کالائیگروکامطالبہ

 سرینگر//پیپلزڈیموکریٹک پارٹی کے ریاستی سیکریٹری یوتھ عارف لائیگرو نے لیفٹیننٹ گورنرانتظامیہ پرزوردیا ہے کہ وہ وحیدپرہ کورمضان کے موقعہ پررہا کریں۔ایک بیان میں انہوں نے کہا کہ مرکزی حکومت کوپیپلزڈیموکریٹک پارٹی کے یوتھ ونگ  کے صدرکورہا کرنا چاہیے کیوں کہ عیدالفطرآرہی ہے۔لائیگرونے کہا کہ عید آرہی ہے اور اس موقعہ پر ہرایک کو اپنے کنبے کے ساتھ ہونا چاہیے اوراسی طرح وحید پرہ کابھی حق ہے کہ وہ عید اپنے اہلخانہ کے ساتھ منائیں۔

 

 

کرناہ میں پاگل کتے کے حملے میں متعدد افراد زخمی

کپوارہ//اشرف چراغ //شمالی قصبہ کرناہ میں پاگل کتے نے ہڑ بونگ مچا دی ہے اور اب تک پاگل کتے کے حملے میں متعددافراد زخمی ہوگئے ہیں ۔ کر ناہ کے نواںگبرا علاقہ میں اچانک ایک پاگل کتا نمو دار ہوا جس نے ایک راہگیر محمد الطاف مرچال پر حملہ کر کے اسے بری طرح زخمی کر دیا جس کے بعد پاگل کتا بھاگتے ہوئے گبرا کے مرکزی محلہ میں داخل ہو گا ۔مقامی لوگو ں کا کہنا ہے کہ اس پاگل کتے نے اپنے حملے میں ایک درجن شہری جن میں بچے اور معمر اشخاص بھی شامل ہیں کو بری طرح زخمی کر دیا جس کی وجہ سے پوری بستی خوف زدہ ہے اور لوگ اپنے گھرو ں سے باہر آنے میں کتراتے ہیں ۔پاگل کتے کے حملے میں الطاف مرچال ،مرتضیٰ ماگرے ،شفقت کھوکھر ،خالد کھوکھر اور مڈل سکول میں دو بچیو ں سمیت غلام جیلانی نامی معمر شہری زخمی ہوئے ہیں ۔ تمام زخمیو ں کو مقامی اسپتال میں علاج و معالجہ کے لئے دا خل کیا گیا جہا ں خالد کھو کھر کو نازک حالت میں سرینگر منتقل کیا گیا ۔مقامی لوگو ں نے انتظامیہ سے مداخلت کی اپیل کرتے ہوئے پاگل کتے کو قابو کرنے کا مطالبہ کیا ہے ۔مقامی لوگو ں نے بتایا کہ پاگل کتے کی ڈر سے ان کے بچے سکول جانے میں بھی خوف محسوس کرتے ہیں جبکہ پوری بستی میں خوف کا ماحول بنا ہوا ہے ۔

 

 

 

 

 

اپنی پارٹی کی سرینگر میں میگا آن لائن ممبرشپ مہم شروع

پہلے روز 800سے زائد افراد پارٹی کے ساتھ جڑگئے

سرینگر// اپنی پارٹی نے امیراکدل حلقہ میں منعقدہ پروگرام کے دوران میگا آن لائن ممبر شپ مہم شروع کی جس کا مقصد نئے ممبران کا پارٹی میں اندراج کرنا تھا۔ مہم کااہتمام پارٹی ضلع نائب صدر اعجاز راتھر، انچارج امیراکدل اشرف ڈار، کارپوریٹر مہجور نگر محمد سلیم کی قیادت میں ہوا۔اِس ایک ماہی مہم کا مقصد وادی بھر میں سماج کے ہرشخص بشمول نوجوان، خواتین اور خاص طور سے عمر رسیدہ افراد کو ممبربنانا ہے۔ اس مہم کے پہلے روز 800سے زائد ممبران پارٹی کے ساتھ جڑے جن کا پارٹی صدر سید محمد الطاف بخاری نے والہانہ استقبال کیا۔ اپنی پارٹی معاون ترجمان سید فضل کاشانی نے کہاکہ ایک ماہی ممبر شپ کے دوران سرینگر میں بڑے پیمانے پر نئے ساتھیوں کو اپنے ساتھ جوڑا جائے گا۔ اسی طرح کے کیمپوں کا اہتمام دیگر اضلاع میں بھی کیاجائے گا۔ مہم صرف ممبر شپ کارڈ تک ہی محدود نہیں بلکہ معیاری حیات اور اپنی ترقی کے حق کے لئے سماج کے ہر فرد کی سماجی ذمہ داری اور یکساں شراکت داری کی حوصلہ افزائی کرنا ہے ۔ ممبران کو عوام میں بیداری پھیلانے کے لئے سماجی ذمہ داریاں بھی دی جائیں گیں۔پارٹی نے ایک وہاٹس ایپ نمبر8899606090بھی مخصوص کیا ہے جس پر پارٹی میں شامل ہونے والے خواہشمند رابطہ قائم کرسکتے ہیں۔

 

 

سوپور میں پولیس کمیونٹی گروپ پارٹنر شپ میٹنگوں کا انعقاد

سرینگر// پولیس نے پانزلہ تھانہ اور پولیس پوسٹ وترگام سوپور میں پولیس کمیونٹی پارٹنرشپ گروپ میٹنگوں کا انعقاد کیا۔پولیس پوسٹ وترگام میں میٹنگ کی صدارت ایس ڈی پی او رفیع آباد امین بٹ نے کی جس میں ایس ایچ او تھانہ ڈنگی وچھہ، انچارج پی پی وترگام اور دیگر افسران موجود تھے۔ میٹنگ میں بہرام پورہ، ہدی پورہ، وترگام، لڈورہ، حب ڈنگر پورہ اور دیگر دیہات کی اوقاف کمیٹیوں نے شرکت کی۔اسی طرح ایک اور اجلاس تھانہ پانزلہ میں منعقد ہوا جس کی صدارت ایس ایچ او پنزلہ نے کی۔ اجلاس میں کئی علاقوں کے نمائندوں نے شرکت کی۔ان اجلاسوں میں شرکاء نے عوامی اہمیت کے متعدد مسائل کو اٹھایا۔پولیس افسران نے پولیس اور سول محکموں سے متعلق شکایات کے بروقت ازالے کی یقین دہانی کرائی اور ان کے فوری ازالے کے لیے متعلقہ حکام کے ساتھ بات کی ۔ شرکاء کو تمام تجارتی اداروں میں سی سی ٹی وی کیمرے لگانے کا بھی مشورہ دیا گیا۔ افسران نے شرکاء سے یہ بھی درخواست کی کہ وہ اپنے اپنے علاقوں کے نوجوانوں کو نشے سے دور رہنے اور منشیات کے عادی افراد/فروشی کرنے والوں پر نظر رکھنے کا مشورہ دیں۔ان میٹنگوںکے شرکاء نے سماجی برائیوں سے نمٹنے کے لیے پولیس کے ساتھ اپنے مکمل تعاون کا یقین دلایا اور کمیونٹی انٹریکشن میٹنگز میں سہولت فراہم کرنے میں پولیس کی کوششوں کو بھی سراہا جہاں شرکاء آزادانہ طور پر اپنی رائے کا اظہار کرتے ہیں۔

 

علمدار نرسنگ کالج نے عالمی یوم صحت منایا

چرار شریف//علمدار میموریل کالج آف نرسنگ اینڈ میڈیکل ٹیکنالوجی چرار شریف، اسلامک یونیورسٹی آف سائنس اینڈ ٹیکنالوجی اونتی پورہ نے عالمی یوم صحت پرایک تقریب کا اہتمام کیا۔ پروگرام کی پرنسپل آرگنائزنگ چیئرپرسن، پروفیسر (ڈاکٹر) محمودہ ریگو نے سامعین کو پائیدار ترقی کے اہداف کے حصول کے لیے پرعزم ہونے کے بارے میں لوگوں میں بیداری پیدا کرنے کی فوری ضرورت کے بارے میں روشنی ڈالی۔ اس سے قبل تقریب کی آرگنائزنگ سیکریٹری بشریٰ مشتاق نے خطبہ استقبالیہ پیش کیا اور اس کی افادیت پیش کی جس نے مختلف ماحولیاتی وجوہات اور ماحولیاتی بحرانوں پر روشنی ڈالی جو کہ انسانیت کو درپیش صحت کے لیے سب سے بڑا خطرہ ہیں۔پروگرام میں ایک مباحثہ ہوا جس کے بعد B.Sc کی طرف سے ماڈل پریزنٹیشنز شامل تھیں۔ مزید برآںسامعین میں صحت سے متعلق آگاہی پھیلائی گئی۔ پروگرام کا اختتام جیتنے والوں میں انعامات اوراسناد تقسیم کی گئیں۔

ڈیری اور پولٹری سے متعلق اسکیمیں

 

ڈپٹی کمشنر نے مختلف یونٹوں کا دورہ کیا

عازم جان

بانڈی پورہ// ڈپٹی کمشنر بانڈی پورہ ڈاکٹر اویس احمد نے ہفتہ کو محکمہ حیوانات بانڈی پورہ کی جانب سے ڈیری اور پولٹری سے متعلق مختلف اسکیموں کے تحت قائم کردہ مختلف یونٹوں کا دورہ کیا۔ ان کے ساتھ چیف اینیمل ہسبنڈری آفیسرڈاکٹر جی اے لون اور دیگر افسران بھی تھے۔ ڈاکٹر اویس نے جے کے ایم پی سی ایل نادی ہل، ہرمکھ ڈیری فارم، انشا فروزن فوڈز نسبل، سلسبیل پنیر بنانے والے یونٹ آشا کی بلک کولنگ سہولت کا دورہ کیا اور مالکان سے بات چیت کے علاوہ ان یونٹس کے کام کا معائنہ کیا۔ ڈاکٹر جی اے لون نے انہیں ضلع کے ڈیری فارموں کی مارکیٹنگ مداخلت میں جے کے ایم پی سی ایل کے کردار کے بارے میں تفصیل سے بتایا۔ ہرمکھ ڈیری فارم میں افسران نے بتایا کہ فارم کے پاس IDDSاسکیم کے تحت قائم 20ڈیری کا یونٹ ہے۔ ڈاکٹر اویس نے اس کے مالک اعزاز احمد کے ساتھ بات چیت کی جو پوسٹ گریجویٹ ہیں اور اپنا کاروبار شروع کرنے کیلئے کنٹریکچول لیکچرر کی نوکری چھوڑ چکے ہیں۔ ڈاکٹر اویس نے انتہائی پیداواری اسٹاک اور فارم کے منافع بخش اسٹیٹس کو دیکھ کر بہت متاثر ہوئے اور انہوں نے یہ دیکھ کر خوشی کا اظہار کیا کہ ضلع کے پڑھے لکھے نوجوان یونٹوں میں روزگار کے مواقع پیدا کرنے کے علاوہ آمدنی کا ایک اچھا ذریعہ پیدا کرنے کے لیے ایسے منصوبے شروع کر رہے ہیں۔ نسبل میں انشا فروزن فوڈز یونٹ کے دورے کے دوران افسران نے اطلاع دی کہ یونٹ کو محکمہ کی آئی پی ڈی پی اسکیم کے تحت بڑھایا گیا ہے۔ ڈاکٹر اویس نے اس کے مالک مدثر امین (MBA)سے بات چیت کی۔ ڈاکٹر اویس نے اس پروجیکٹ کی کامیابی پر اطمینان کا اظہار کیا کہ ایک پڑھے لکھے کاروباری شخص نے اسے منافع بخش طریقے سے چلانے کے ساتھ ساتھ یونٹ میں بہت زیادہ روزگار بھی پیدا کیا ہے۔  ڈاکٹر اویس نے بالعموم محکمہ حیوانات بانڈی پورہ اور سی اے ایچ او بانڈی پورہ، ڈاکٹر جی اے لون کی خاص طور پر ضلع میں اس طرح کے شاندار یونٹوں کے قیام اور کام کرنے کی کوششوں کی تعریف کی جس کی وجہ سے ضلع نے تقریبا 3 لاکھ کی ریکارڈ پیداوار حاصل کی ہے۔انہوں نے رواں مالی سال کے دوران آئی ڈی ڈی ایس کے تحت 72 ڈیری یونٹس، آئی پی ڈی پی کے تحت 18یونٹس قائم کرنے میں محکمہ کی کامیابی کو سراہا، جس سے روزگار کے 270سے زائد مواقع پیدا ہوئے۔ دورے کے اختتام پر، ڈی سی بانڈی پورہ نے ضلع کے پڑھے لکھے نوجوانوں سے اپیل کی کہ وہ اپنا کاروبار شروع کرنے کے لیے ڈیری/پولٹری یونٹس کے قیام کے لیے محکمہ حیوانات کی اسکیموں سے فائدہ اٹھائیں۔ 

 

اے ڈی سی سوپور

سے اظہار تعزیت

سرینگر// اے ڈی سی سوپور پرویز سجاد گنائی کے والد حاجی محمد مقبول گنائی ساکن ٹینگن یاری پورہ کولگام گزشتہ روز انتقال کر گئے۔مقامی خبررساں ادارے سی این آئی نے سوگوار خاندان کے ساتھ تعزیت اور ہمدردی کا اظہار کیا ہے اور مرحوم کی مغفرت کیلئے دعا کی ہے ۔

 

یوم مہجورپرپلوامہ اور شوپیان میں تقریبات 

سرینگر//شاعر کشمیر مہجور کی برسی پر ادبی تنظیموں اور سرکاری تعلیمی اداروں کی جانب سے تقریبات کا انعقاد کیا گیا ۔گورنمنٹ بائز ہائر سیکنڈری سکول پلوامہ میں یوم مہجور کے حوالے سے تقریب کا انعقاد کیا گیا جس میں سکول کے پرنسپل شیخ محمد اقبال نے بطور مہمان خصوصی شرکت کی۔شوپیان کے گورنمنٹ ہایر سیکنڈری سکول نارہ پورہ میں شاعر کشمیر مہجور کی برسی پر پروقار تقریب کا انعقاد کیا گیا۔جس میں سکول کے وائس پرنسپل پرویز احمد بٹ، علاقہ شوپیاں کے مانے جانے والے شاعر، محقق، تنقید نگار محمد اشرف راوی کے علاوہ دیگر کئی شخصیات نے شرکت کی۔شاعر کشمیر مہجور کی برسی پر ادبی تنظیموں اور سرکاری تعلیمی اداروں کی جانب سے تقریبات کا انعقاد کیا گیا۔اس حوالے سے مہجور کے آبائی ضلع پلوامہ میں ایک تقریب مہجور میموریل گورنمنٹ بائز ہائر سیکنڈری سکول پلوامہ میں منعقد ہوئی۔تقریب میں اساتذہ اور سکول میں زیر تعلیم طالب علموں کی ایک بڑی تعداد نے شرکت کی۔اس موقع پر سکول کے پرنسپل شیخ محمد اقبال نے شاعر کشمیر کو شاندار الفاظ میں خراج عقیدت پیش کرتے ہوئے کہا کہ ضلع پلوامہ کو اس بات کا فخر حاصل ہے کہ شاعر کشمیر مہجور نے یہاں سے جنم لیا ہے۔ انہوں نے کہا کہ مہجور نے اپنی شاعری میں بدی کا راستہ چھوڑنے کا راستہ اپنانے کا مشورہ دیا ۔سکول کے دیگر اساتذہ نے شاعر کشمیر پیرزادہ غلام احمد مہجور کو ان کی برسی پر یاد کر کے انہیں شاندار خراج عقیدت پیش کیا۔ادھر گورنمنٹ ہایر سکنڈری سکول نارہ پورہ شوپیان میں شاعر کشمیر غلام احمد مہجور کی 70 ویں برسی بڑی دھوم دھام سے منائی گئی۔کے این ایس

 

ڈاکٹر فاروق کا رام بن دورہ

پارٹی کے سوگوار کنبوں سے تعزیت پرسی 

سرینگر//نیشنل کانفرنس صدرڈاکٹر فاروق عبداللہ نے پارٹی کے سینئر رکن حکیم جگرناتھ ساکن کرول رام بن اورحاجی محمد ارشد ملک کے گھر بٹوٹ رام بن کے گھر جاکر سوگوار خاندانوں کے ساتھ تعزیت پُرسی کی ۔ انہوںنے دونوں مرحومین کے عوامی اور سماجی خدمات کو یاد کیا۔ اس کے علاوہ انہوں نے ضلع رام بن کے یوتھ لیڈر فاروق احمد ملک کے گھر جاکر بھی تعزیت پرسی کی ۔یاد رہے کہ فاروق احمد ملک کی والدہ گذشتہ دنوں انتقال کر گئی تھیں۔ ڈاکٹر فاروق عبداللہ کے ہمراہ سینئر پارٹی لیڈران چمن لعل گپتا، سجاد شاہین، اسرار خان، عابد ماگرے، عارف میر، ایڈوکیٹ ارجن راجو اور عارف وانی بھی تھے۔