ایم ایم پرویز
رام بن// ماروگ میں دو بھاری گاڑیوں کے درمیان تصادم کی وجہ سے ہفتہ کو سری نگر جموں قومی شاہراہ پر ٹریفک کی آمدورفت چند گھنٹوں کے لئے درہم برہم رہی۔ٹریفک حکام نے بتایا کہ ماروگ کے مقام پر دو ٹرکوں کے درمیان تصادم کی وجہ سے رام بن اور رامسو کے درمیان گاڑیوں کی آمدورفت ہفتہ کی صبح 2 بجے سے صبح 8 بجے تک جموں سری نگر قومی شاہراہ پر ماروگ کے قریب معطل رہی۔
ایس ایس پی ٹریفک نیشنل ہائی وے رامبن روہت بکسوترا نے بتایا کہ ماروگ پر قومی شاہراہ کو دوپہر 2 بجے دو ٹرکوں کے درمیان حادثہ کی وجہ سے بلاک کر دیا گیا تھا، جس کی وجہ سے دونوں طرف کی ٹریفک روک دی گئی تھی۔انہوں نے کہا کہ کرینوں کی مدد سے سخت کوششوں سے دونوں گاڑیوں کو ہٹایا گیا اور قومی شاہراہ پر ہفتہ کی صبح 8 بجے ٹریفک دوبارہ شروع کر دیاگیا۔ٹریفک حکام نے بتایا کہ خانہ بدوشوں کی ان کے مویشیوں کے ساتھ بڑے پیمانے پر پیدل نقل و حرکت کی وجہ سے اورڈلواس اور مہاڑ-کیفے ٹیریا کے درمیان سڑکوں پر سنگل لین کی وجہ سے چھ بھاری گاڑیوں کے ٹوٹنے کی وجہ سے ہائی وے پر ٹریفک کی سست رفتاری دیکھی گئی ۔رام بن میں ٹریفک حکام نے کہا کہ رکاوٹ کے باوجود سیکڑوں ہلکی، درمیانی اور بھاری گاڑیاں ایک منظم طریقے سے اپنی متعلقہ منزلوں کے لئے رام بن – بانہال سیکٹر سے گزریں۔ اس رپورٹ کے درج ہونے تک ہائی وے کھلا ہے اور جموں سری نگر ہائی وے پر دونوں طرف سے بغیر کسی رکاوٹ کے گاڑیاں چل رہی ہیں۔
