لائوڈا کا سکارڈ متعدد علاقوں میں نمودار

 سرینگر// ڈل جھیل اور اس کے گرد ونواح میں ناجائز تجاوزات ہٹانے کی مہم کوجاری رکھتے ہوئے لیکس اینڈ واٹر ویز ڈیو لپمنٹ اتھارٹی (LAWDA)اور پولیس کے مشترکہ سکارڈ نے سوموار کونشاط ،حبک،شالیمار ،چشمہ شاہی ،زکورہ اور نگین علاقوں میں کارروائی کرتے ہوئے متعددڈھانچوں کو منہدم کیا ۔لائوڈا کے انفورسمنٹ آفیسر کی ہدایت پر مسماری ٹیم نے زیٹھ یار نشاط ،حبک ،آرہ بل شالیمار ،کار پورچشمہ شاہی ،زکورہ ،نگین اور کبوتر خانہ ڈل علاقوں میں غیر قانونی طور تعمیر کئے جارہے کئی ڈھانچوں کو منہدم کیا۔ لاوڈا کے ایک ترجمان نے کہا کہ محکمہ عدالتی احکامات کے تحت من وعن زمینی سطح پر متحرک ہے اورانہدامی مہم جاری رہے گی۔اتھارٹی نے ڈل اور نگین جھیلوں کے گرد و نواح میں غیر قانونی طور ڈھانچے تعمیر کرنے والوں کو متنبہ کیا ہے کہ وہ اپنی حرکتوں سے باز آئیں ۔لائوڈ کے ڈی ایس پی سہیل ریشی نے کہا کہ ان کے دائرہ اختیار میں آنے والے غیر قانونی طور تعمیر کئے گئے ڈھانچوں اور عمارتوں کو منہدم کرنے کی کارروائی جاری رہے گی او راس عمل میں رکاوٹیں پیدا کرنے والوں کے خلاف قانون کے تحت کارروائی عمل میں لائی جائے گی۔انہوںنے کہا کہ لائوڈا کے حدود اختیار میںرہنے والے شہریوں کو ہدایت دی گئی ہے کہ وہ غیر قانونی کوئی بھی تعمیراتی کام ہاتھ میںنہ لیں ۔