شوکت حمید
سرینگر// نیشنل کانفرنس لیڈر اورممبر پارلیمنٹ آغا روح اللہ نے کل کہا کہ اسمبلی میں دفعہ370 کے متعلق قرار داد کی منظوری ہماری جدوجہد کا ایک راستہ ہے جس کو آج کھول دیا گیا۔ اسمبلی اجلاس کے تیسرے دن بدھ کوایوان میںدفعہ 370 کی بحالی کی قرارداد کو اکثریتی ووٹوں سے منظور کیا۔اسمبلی کے باہر آغا روح اللہ نے نامہ نگاروں سے بات کرتے ہوئے کہا ’ہم نے پہلے ہی کہا تھا کہ اسمبلی میں معمول کے بزنس کے پہلے ہی دن اس قرار داد کو پاس کیا جائے گا،اسمبلی میں پہلا اور دوسرا دن معمول کی بزنس کا نہیں ہوتا ہے اور آج معمول کی بزنس کا پہلا دن تھا تو نیشنل کانفرنس نے وعدے کے مطابق اس قرار داد کو پیش کیا جس کو منظور کیا گیا’۔انہوں نے کہا ’میں اپنی تنظیم اور دوسرے ساتھیوں کا شکر گذار ہوں جنہوں نے وعدے کو پورا کیا‘‘۔انہوں نے کہا’’بات یہاں پر ہی ختم نہیں ہوتی ہے یہ جدو جہد کا ایک راستہ ہے جس کو آج کھول دیا گیا‘۔انہوں نے مزید کہا’’میں نے اپنی گنجائش کے مطابق پارلیمنٹ میں اس کے متعلق کوشش کی اور اب اسمبلی کے ذریعے یہ بات پہنچانے کی ضرورت تھی اور جس کو آج پورا کیا گیا۔ایک سوال کے جواب میں انہوں نے کہاکہ سپیکر کے کام پر اگر بی جے پی درس نہ دے اچھا رہے گا۔
