حسین محتشم
پونچھ //پونچھ ضلع میں سیکورٹی فورسز نے گلپور کے علاقے میں دراندازی کی ایک بڑی کوشش کو ناکام بناتے ہوئے لائن آف کنٹرول پر تین دہشت گردوں کو گرفتار کیا ہے، ان سے منشیات کی ایک بڑی کھیپ، بارہ کلو گرام دیسی ساختہ دھماکہ خیز ڈیوائس (آئی ای ڈی) برآمد ہوئی ہے۔گرفتار دہشت گردوں کا تعلق پونچھ کے گاؤں کھڑی کرماڑاسے ہے اور وہ منگل اور بدھ کی درمیانی شب لائن آف کنٹرول سے دراندازی کر رہے تھے۔
جموں کے دفاعی ترجمان کے ذریعہ جاری کردہ فوج کے سرکاری بیان میں لیفٹیننٹ کرنل دیویندر آنند نے کہا کہ فوج اور پولیس کے مشترکہ آپریشن میں، دہشت گردوں کو پونچھ سیکٹر میں لائن آف کنٹرول پر اس وقت روکا گیا جب وہ 30 اور 31 مئی کی درمیانی رات خراب موسم اور تیز بارش کا فائدہ اٹھاتے ہوئے حد متارکہ کو عبور کرنے کی کوشش کر رہے تھے۔دفاعی ترجمان نے بتایا کہ ’’درمیان شب 1:30بجے کے قریب نقل و حرکت کا سراغ لگانے کے بعدان کو چیلنج کیاگیا تاہم انہوں نے فائرنگ کی جبکہ فوج کی جوابی فائرنگ میں کچھ دہشت گرد مارے گئے ۔
اپنے بیان میں ان کا مزید کہنا تھا کہ علاقے کو گھیرے میں لے کر سرچ آپریشن شروع کر دیا گیا ہے۔ترجمان نے کہا کہ ’’خون کے نشانات ملے اور تلاشی کے دوران تین دہشت گرد پکڑے گئے‘۔انہوں نے مزید کہا کہ کچھ ہتھیار، ایک آئی ای ڈی اور نارکو سمیت جنگی سامان برآمد کیا گیا ہے۔انہوں نے مزید کہا کہ فائرنگ میں فوج کا ایک سپاہی زخمی ہوا اور اسے نکال لیا گیا ہے جبکہ تلاشی کارروائیاں جاری ہیں۔فورسز نے مزید بتایا کہ گرفتار دہشت گردوں کے قبضے سے اسلحہ، بارود اور منشیات کی بھاری کھیپ برآمد ہوئی ہے۔
بازیابی میں میگزین میں بیلنس 10 راؤنڈز کے ساتھ ایک AK56 رائفل ،دو پستول بمعہ دو میگزین اور ستر راؤنڈز، جدید ترین برتن میں چھپایا گیا ایک بارہ کلو گرام آئی ای ڈی، چھ چینی دستی بم اور منشیات کے بیس پیکٹ وغیرہ برآمد کئے گئے ہیں ۔دوسری جانب سرکاری ذرائع نے بتایا کہ پکڑے گئے تینوں دہشت گردوں کا تعلق پونچھ کے گاؤں کھڑی کرماڑہ سے ہے اور ان کی شناخت محمد ریاض (23) ولد محمد فاروق سکنہ کرماڑہ، محمد فاروق (26) ولد محمد رفیق سکنہ کرماڑہ اورمحمد زبیر (22) ولد محمد رزاق سکنہ کرماڑہ کے طورپر ہوئی ہے ۔
ان میں سے محمد فاروق (26) ولد محمد رفیق گولی لگنے سے زخمی ہے اور اس وقت مقامی سول ہسپتال میں زیر علاج ہے جبکہ دیگر دو کو حراست میں لے کر پوچھ تاچھ جاری ہے۔پولیس حکام کا مزید کہنا تھا کہ آپریشن کے دوران برآمد ہونے والے منشیات کے بیس پیکٹ ہیروئن نما ہے جو کہ دہشت گردی کی سرگرمیوں کی مالی معاونت کے لئے نارکو ٹیرر ماڈیول کے حصے کے طور پر اسمگل کی جا رہی تھی۔
گرفتار افراد کے گھروں کی تلاشی لی گئی
عشرت حسین بٹ
پونچھ//پونچھ ضلع کے گلپور سیکٹر میں تین مشتبہ افرادکی گرفتاری کے بعد سیکورٹی فورسز نے گرفتارشدگان کے رہائشی مکانوں کو محاصرے میں لے کر پڑے پیمانے پر تلاشی آپریشن شروع کیا ہے۔ذرائع نے بتایا کہ پونچھ ضلع کے گلپور سیکٹر میں بدھ کو اللصبح سیکورٹی فورسز نے مختصر تصادم کے دوران تین مقامی ملی ٹینٹوں کو حراست میں لے لیا ۔
انہوں نے بتایا کہ پوچھ تا چھ کے بعد سیکورٹی فورسز کو پتہ چلا ہے کہ تینوں گرفتار شدہ ملی ٹینٹ پونچھ کے کرماڑا علاقے کے رہنے والے ہیں جس کے بعد سیکورٹی فورسز نے علاقے کو محاصرے میں لے لیا۔ذرائع نے بتایا کہ گرفتار شدگان کے گھروں کی بڑے پیمانے پر تلاشی شروع کی گئی جبکہ آس پاس ان کے رشتہ داروں کے گھروں کی بھی تلاشی لی جا رہی ہے ۔
حکام کے مطابق اس سازش میں کئی اور لوگوں کے ملوث ہونے کے پیش نظر گرفتار ملی ٹینٹوںکے گھروں کے ساتھ ساتھ آبائی علاقوں کی بھی تلاشی لی جا رہی ہے ۔آخری اطلاعات ملنے تک علاقے میں تلاشی آپریشن جاری تھا۔ ایس ایس پی پونچھ وینے کمار نے اس آپریشن کو کامیابی سے تعبیر کرتے ہوئے کہا کہ گرفتار شدہ ملی ٹینٹوں سے پوچھ تا چھ جاری ہے جس سے سیکورٹی فورسز کو مزید کامیابی حاصل ہو سکتی ہے۔
۔۔۔۔۔۔۔۔۔۔۔۔
