فنڈنگ اور جنگجویت کے بہی خواہوں کا علاج لازمی

جموں//جموں وکشمیر گورنر ستیہ پال ملک نے کہا کہ ریاست میں ملی ٹینسی کے خاتمے کے لئے ’ٹیررمانیٹرنگ گروپ‘ کو تشکیل دینا انتہائی ضروری تھا۔ انہوں نے کہا کہ ٹیرر فنڈنگ اور جنگجو تنظیموں کے بہی خواہوں کے ساتھ سختی سے نمٹا جائے گا۔ گورنر موصوف نے ہفتہ کے روز یہاں ایک تقریب کے حاشیہ پر نامہ نگاروں کے سوالات کا جواب دیتے ہوئے کہا ’ٹیرر فنڈنگ اور دہشت گرد تنظیموں کے بہی خواہ ہر ایک جگہ ہیں۔ جب تک ان کا علاج نہیں ہوگا تب تک دہشت گردی کو روکنا مشکل ہے،ٹیرر مانیٹرنگ گروپ اسی کے لئے بنایا گیا ہے‘۔ گورنر ستیہ پال ملک نے ’ٹیرر مانیٹرنگ گروپ‘ کے تشکیل کے حوالے سے جاری حکم نامے میں سرکاری ملازمین کے ذکر پر کہا ’میں ملازمین کی بات نہیں کرتا، میں ان سب کی بات کرتا ہوں جو دہشت گرد تنظیموں کے ساتھ جڑے ہیں یا ان کو تعاون فراہم کرتے ہیں۔ میں ان کی بات کرتا ہوں جو ان کے بہی خواہ ہیں‘۔