عظمیٰ نیوز سروس
جموں//ادھم پور ضلع میں کسانوں کو ایک اہم زرعی کیڑوں فال آرمی ورم کے انتظام اور کنٹرول کے بارے میں آگاہی دینے کے لئے تین سے چار دنوں سے ایک وسیع بیداری مہم چلائی گئی۔اس بیداری مہم کے دوران متعدد علاقوں بالخصوص نالہ مالیان، گوردھی جاگیر، گوردھی خاص، کاگھوٹ، امروہ اور سب ڈویژن رام نگر، ضلع ادھم پورمیں مذکورہ مہم کے تحت کسانوں کو بیدار کیاگیا ۔ڈائریکٹر زراعت جموں ارویندر سنگھ رین کی رہنمائی اور ضلع ادھم پور کے ضلع اور سب ڈویژنل زراعت افسران کی کاوشوں کے تحت یہ بیداری کیمپ نہایت احتیاط کے ساتھ منعقد کئے گئے۔کسانوں نے بڑھ چڑھ کر حصہ لیا اور فال آرمی ورم کے خلاف انتظام اور کنٹرول کی حکمت عملیوں کے بارے میں سیکھا۔جموں ڈویژن کے تمام مکئی اگانے والے اضلاع کو ڈائریکٹوریٹ آف ایگریکلچر جموں کی طرف سے کیڑے مکوڑوں پر قابو پانے کے تدارک کے لئے تکنیکی ایڈوائزری بھی جاری کی گئی ہے۔محکمہ زراعت اور سکاسٹ جموں کی مشترکہ ماہرین کی ٹیم ادھم پور اور ریاسی اضلاع کے متاثرہ علاقوں کا دورہ کرنے کے لئے تشکیل دی گئی ہے تاکہ ان متاثرہ علاقوں میں اصلاحی اقدامات کے لئے تجاویز فراہم کی جا سکیں۔مہم کے دوران، اہم وسائل جیسے پی پی کیمیکلز اور معلوماتی پمفلٹ کسانوں میں تقسیم کئے گئے تاکہ فال آرمی ورم کے خلاف موثر انتظامی طریقوں کو نافذ کرنے میں ان کی مدد کی جا سکے۔
