عظمیٰ مانٹرنگ ڈیسک
غزہ //صیہونی فوج نے رات کی تاریکی میں ایک بار پھر غزہ کے مکینوں پر بارود کی برسات کردی، 24 گھنٹوں میں مزید 162 فلسطینی ہلاک ہوگئے۔ گزشتہ چند گھنٹوں میں اسرائیلی فورسز نے تل نابلس، تلکرم، البریح اور قلقیلیہ کے علاوہ العروب پناہ گزین کیمپ پر چھاپے مارے، اس کے علاوہ اسرائیل کی جانب سے خان یونس اور دیر البلاح پر تازہ حملوں میں مزید 15 فلسطینیوں کو ہلاک کردیا۔اسرائیل کی وحشیانہ بمباری سے 24 گھنٹوں میں مزید 162 فلسطینی ہلاک ہوئے، ہلاکتوں کی مجموعی تعداد 22 ہزار 600 ہوگئی جبکہ تقریبا 57 ہزار سے زائد افراد زخمی ہوچکے ہیں۔اقوام متحدہ کے انسانی ہمدردی کے سربراہ گریفتھس کا کہنا ہے کہ اسرائیل کی جانب سے فلسطین کے جنوب میں واقع العمل ہسپتال پر حملے کے بعد غزہ فلسطینیوں کے لیے ’موت اور مایوسی‘ کا مقام بن گیا ہے۔صیہونی فوج کی غزہ کے ساتھ ساتھ لبنان پر بھی حملوں کا سلسلہ جاری ہے، جنوبی علاقے میں ایک بار پھر حزب اللہ کے ٹھکانوں کو نشانہ بنایا، حزب اللہ کے سربراہ حسن نصر اللہ نے اپنے تازہ بیان میں اسرائیل کو سخت نتائج سے خبردار کردیا۔عرب میڈیا کا بتانا ہے کہ 7اکتوبر سے اب تک اسرائیلی فورسز نے مقبوضہ مغربی کنارے پر متعدد کارروائیاں کی ہیں جن میں 3800 فلسطینی زخمی ہوئے اور 325 ہلاک ہوچکے ہیں۔ادھر لبنان نے منگل کو بیروت میں اسرائیل کے مہلک حملے کے بعد اقوام متحدہ کے سکریٹری جنرل انتونیو گوٹریس اور اقوام متحدہ کی سلامتی کونسل کے صدر کو شکایت کا خط بھیجا ہے ۔
