ایجنسیز
غزہ //جنگ بندی معاہدے کی کوششیں تیز ہوتے ہی اسرائیلی فوج نے غزہ پر حملے بڑھا دیئے۔ 24 گھنٹوں کے دوران 50 مقامات پر بمباری سے متعدد فلسطینی جاں بحق ہوگئے۔غزہ کے علاقے شجاعیہ میں کئی روز سے جاری فوجی آپریشن میں 100 فلسطینی جاں بحق ہوچکے ہیں۔فلسطینی گروپوں کی جانب سے شدید مزاحمت کی جارہی ہے۔ مارٹر گولوں، راکٹوں سے حملوں میں کئی اسرائیلی فوجی ہلاک ہوگئے۔ اسرائیلی ہیلی کاپٹر کو بھی نشانہ بنایا گیا۔ادھر مقبوضہ مغربی کنارے کے جنین کیمپ میں اسرائیلی فوج نے 7 فلسطینی جاں بحق کردیے۔غزہ بھر میں فضائی حملوں میں مزید 27 فلسطینی جاں بحق ہو گئے۔ الجزیرہ کی رپورٹ کے مطابق اسرائیلی فورسز نے خان یونس اور رفح کے آس پاس کے علاقوں کو نشانہ بنایا، جس میں لوگوں کے ایک گروپ پر حملہ بھی شامل ہے جو تجارتی مال بردار ٹرکوں کو غزہ میں داخل ہونے میں سہولت فراہم کر رہے تھے۔رپورٹ کے مطابق اس حملے میں کم از کم 10 افراد جاں بحق ہوئے، زخمیوں کو نصیر ہسپتال منتقل کیا گیا۔اسرائیلی خفیہ ایجنسی موساد کے سربراہ کی سربراہی میں اسرائیلی وفد قطری ثالث کاروں سے ملاقات کے بعد واپس آگیا۔اسرائیلی حکام کا کہنا ہے کہ فریقین میں اختلافات برقرار ہیں، اسرائیلی وفد اگلے ہفتے دوبارہ بات چیت کے لیے قطر جائیگا۔حماس نے غزہ میں بین الاقوامی فوج کی تعیناتی کے کسی بھی ممکنہ منصوبے کو مسترد کر دیا ہے۔ادھراسرائیلی فوج کی لبنان میں حزب اللہ سے بھی جھڑپیں جاری ہیں۔ حزب اللہ نے 17 راکٹ حملوں میں اسرائیلی عمارتوں اور فوجی ٹھکانوں کو نشانہ بنایا۔
