غزہ : اسرائیلی فورسزکی فائرنگ‘ 4 فلسطینی جاں بحق‘ 955 زخمی

یروشلم// غزہ میں فلسطینیوں کے احتجاجی مظاہرے کے دوران اسرائیلی فوج کی فائرنگ سے4 فلسطینی جاں بحق اور950 سے زائد زخمی ہوگئے۔تفصیلات کے مطابق فلسطینیوں کی جانب سے جمعے کے روز کیے جانے والے احتجاجی مظاہرے پراسرائیلی فوج نے فائرنگ کی جس سے 3 فلسطینی جاں بحق اور 950 سے زائد زخمی ہوگئے۔فلسطینی وزارت صحت کے مطابق ہفتے کے روز فائرنگ سے زخمی ہونے والا ایک اور فلسطینی نوجوان جاں بحق ہوگیا جس سے دو روز میں اسرائیلی فورسز کی فائرنگ سے جاں بحق ہونے والوں کی تعداد 4 ہوگئی۔میڈیا رپورٹس کے مطابق گزشتہ ماہ مارچ سے ہونے والے احتجاج میں اسرائیلی فورسز کی فائرنگ سے اب تک 45 فلسطینی جاں بحق اور 6 ہزار سے زائد زخمی ہوچکے ہیں۔خیال رہے کہ اسرائیلی فوج سرحد پرلگی باڑ کی دوسری جانب سے اسنائپرز کا استعمال کرتی ہے جبکہ فضائیہ کا بھی استعمال کیا جاتا رہا ہے۔یاد رہے کہ گزشتہ ماہ 31 مارچ کو فلسطینی عوام کی جانب سے اسرائیلی بارڈر پر کیے جانے والے احتجاج پراسرائیلی فورسز کی شدید فائرنگ سے 17 شہری جاں بحق جبکہ 1500 سے زائد زخمی ہوگئے تھے۔واضح رہے کہ فلسطینیوں کی جانب سے اسرائیلی قبضے اور مقامی افراد کو بے دخل کرنے کے 70 سال پورے ہونے کے سلسلے میں احتجاجی مظاہرے کیے جا رہے ہیں اور 15 مئی کو وسیع پیمانے پرسرحدی باڑ کیساتھ احتجاج کرنے کی تیاری کررہے ہیں۔