غزلیات

ڈوبی ہوئی کشتی کا پتوار کہاں ہوگا

جب گھر ہی نہ ہو اپنا،سنسار کہاں ہوگا

روٹی کےہی چکرسےفُرصت نہ کبھی پائے

مزدور ہے بے چارہ بیمار کہاں ہوگا

تحریرِ جلّی جسکی پیغامِ محبت ہو

اس  شہر  میں اک ایسا  اخبار کہاں ہوگا

اس دورکے انساں کوعقبیٰ سے نہیں مطلب

اِس خُوگرِ دنیا کا کردار کہاں ہوگا

ہے فرقہ پرستوں کا ہر کام سمِ قاتل

ان جیسا زمانے میں شہ مار کہاں ہوگا

بس تیری عنایت سے ہم کام کے ہیں ورنہ 

بیکار  سے  ہاتھوں  سے شہکار کہاں ہوگا

اک حبس کے عالم  میں زندہ رہا میں بسملؔ

اب دیکھتا ہوں غم کا اظہار کہاں ہوگا

 

خورشید بسملؔ

تھنہ منڈی راجوری

موبائل نمبر؛9086395995

 

 

فلک سے تو بھی کبھی بندے کو اشارا کر 

کیا ہے شوق سے سجدہ ادا گوارا کر 

 

ہجومِ نور ہے تیرے ہی دسترس میں خدا 

بُجھے بُجھے سے دئے کو مرے ستارا کر 

 

یہ تیرگی کا ہے دشمن یہ روشنی کا حبیب 

اُلجھ رہا ہے ہوا سے دِیا نظارا کر 

 

حصارِ وصل میں اور احتیاط کرنا ہے 

کنارِ قرب پہ جذبات  سے کنارا کر 

 

کھڑے سوال کئے ہیں بہت سوالوں  پر 

کبھی ہمارے گماں پر بھی حل اُتارا کر 

 

تو اپنے حسن کو اور پُرکشش بنا دلبر 

قدم اٹھا کبھی میرا جنوں نکھارا کر 

 

یہ کیا کہ شام ہوئی در پہ غیر کے عادل ؔ

کبھی ہمارے بھی آنگن میں دن گزارا کر 

 

اشرف عادل ؔ

سرینگر کشمیر  

موبائل نمبر؛ 9906540315

 

 

پھر کوئی زخم نیا دل پہ لگانے آئے

“مجھ سے ملنے مرے احباب پرانے آئے ”

 

راہِ ہستی میں بکھیرے تھے جنہوں نے کانٹے

وہ مری قبر پہ اب پھول چڑھانے  آئے

 

فن کو میرے کبھی یاروں نے سراہا ہی نہیں

جب بھی آئے وہ مرے عیب دکھانے آئے

 

تھی مرے پاؤں میں زنجیر وفاداری  کی

ورنہ راہوں میں مری کتنے خزانے آئے

 

لاش رکھی ہوئی ہے کب سے چتا پر یارو

جا کے بیٹے  سے کہو ،آگ لگائے آئے

 

غم وہ تنہا نہ اُٹھا پائے گا اس سے کہہ دو

اپنے آنسو ،مری پلکوں پہ سجانے آئے

 

چاندنی رات میں بچھڑا تھا کوئی ہم سے رفیقؔ

چاند نکلا تو کئی یاد فسانے آئے

 

رفیقؔ عثمانی 

 آکولہ،مہاراشٹرا

[email protected]

 

 

آغازِ محبت میں اپنا انجام دیکھتا هوں

هو رسوائیوں کا ڈر سرِ عام دیکھتا هوں

 

رشتوں کی نزاکت پائمال هو گئی کیوں

اب خاطر و دُعا نه سلام  دیکھتا هوں

 

کانٹا سا چبھ رہا دل کی خلش بڑھی ہے

غیروں سے جب ان کو ہم کلام دیکھتا ہوں

 

نوید  بهار کی  هو ، آمدِ  یار بھی  هو

مسکُراتی کلیوں کا جب پیغام دیکھتا هوں

 

تمهیں کیا پته که اکثر میری زندگی میں آکر

خوشی عارضی رهی هے غم کو دوام دیکھتا هوں

 

شاید که رنگ لائیں اک دن میری وفائیں

دل مُضطرب کے مشتاقؔ جب یه کام دیکھتا هوں

 

خوشنویس میر مشتاقؔ

ایسو (اننت ناگ)

[email protected]

 

 

 

دیوتائوں کو پَھٹے دامن میں بھر کر لے گیا

ایک دیوانہ ترے کُوچے کے پتھر لے گیا

دِن دہاڑے کاٹ کر قاتل میرا سر لے گیا

اور منصف کہتے ہیں اپنا مقدر لے گئے

آج پھر متقل میں کوئی آگیا عزت مآب

آج پھر جلّاد اِک سونے کا خنجر لے گیا

حاکموں کی خواب گاہوں کو سجانے کے لئے

ایک سوداگر کسی معصوم کا سر لے گیا

اے سُبک بادِ صبا گر تُو نہیں تو اور کون

چیتھڑے میرے اُڑا کر آج گھر گھر لے گیا

بارہا غیرت نے روکا عقل نے ٹوکا مجھے

دِل ہمیں مجبور کر کے تیرے در پر لے گیا

شرم آنکھوں کی بدن کا لوچ اور ہونٹوں کا رس

زرکے بدلے میں وہ کیسے کیسے زیور لے گیا

حکم ہے پنچھیؔ کے دونوں ہاتھ پائوں کاٹ دو

کیوں یہ راہِ عام کے سب خار چُن کر لے گیا

 

سردار پنچھیؔ

جیٹھی نگر، مالیر کوٹلہ روڑ، کھنہ پنجاب

موبائل نمبر؛9417091668

 

 

میں بدن جس کے لیے آگ پہ رکھ کر آیا

اک وہی شخص عیادت کو نہ پل بھر آیا

دستِ دل کھول کے جب آپ کے در پر آیا

نور برجستہ نگاہوں میں سمٹ کر آیا

میں دعاؤں کے سہارے پہ چلا جب گھر سے

راہ دِکھلانے کبھی پیڑ تو کنکر آیا

لوٹ آنے کا ارادہ تو نہیں تھا لیکن 

وقتِ رخصت کیوں مرا نام زباں پر آیا

موت کے بعد فقط ذکرِ خدا باقی تھا

مال و زر کام نہ شہرت نہ ذرا گھر آیا

یہ الگ بات ہوئے خاک اسی کے ہاتھوں 

پھول کے ہار میں جس شخص کو دے کر آیا

شہر سے ان کے نہ لوٹا ہوں تہی میں عارف ؔ

ہاتھ میں لے کے تو الزام کے پتھر آیا

 

 جاوید عارفؔ

پہانو شوپیان،کشمیر،موبائل نمبر؛7006800298

 

 

باؤلے دل کا حال کیا ہوتا

گاہ گر اُن کا سامنا ہوتا

کوئی منزل یا راستہ ہوتا

کہیں تو تیرا نقشِ پا ہوتا

وہ مری چُپ کو گِلہ ہی سمجھا

بھلا مجھ کو کیا گِلہ ہوتا

آگہی نے تو مار ڈالا ہے

ہوتا گر بے خبر تو کیا ہوتا

دُکھ نہ تھا ہجر کاٹنے میں ہاں

وہ خوشی سے اگر جدا ہوتا

دور ہوتے ہی جاں نکلتی تو

پھر جدا ہوتا تو کیا ہوتا

وہ صنمِ جاں فزا وہ کیف آور

خواب میں ہی کہیں ملا ہوتا

تو کیا ہوتا اور میں کیا ہوتا

تیرا وعدہ اگر وفا ہوتا

 

توصیف شہریار

سریگفوارہ اسلام آباد

موبائل نمبر؛7780895105

 

 

میں تیرا، جان! ہونا چاہتا ہوں

تری یادوں میں کھونا چاہتا ہوں

 

تجھے میں یاد کر کے تھک چکا ہوں

سو تجھ کو یاد آنا چاہتا ہوں

 

پلایا خوب مجھ کو جامِ الفت

میں اب مدہوش ہونا چاہتا ہوں

 

بہت مُسکا لیا میں نے، لہذا 

ذرا آنسو بہانا چاہتا ہوں

 

اور عزت بھی بہت میں نے کمالی 

میں اب شرمندہ ہونا چاہتا ہوں

 

وہ جس کا جام فیضیؔ دل کو بھایا

ہے ، اس سے چہرا دھونا چاہتا ہوں 

 

فیضان فیضیؔ

دار الہدیٰ پنگنور، آندھرا پردیش

 

 

کیوں ملی ہے سزا نہیں معلوم

مجھ کو اپنی خطا نہیں معلوم 

 

میں سمجھتا تھا باوفا جس کو  

کیوں ہوا بے وفا نہیں معلوم

 

مسکراہٹ ہے سب کے چہرے پر

کون رسوا ہوا نہیں معلوم

 

ماں کے قدموں کو گر نہیں چوما 

تم کو، جنت ہے کیا، نہیں معلوم

 

باغ میں آج ایک تتلی نے 

پھول سے کیا کہا نہیں معلوم

 

ہو گیا ہے مریضِ عشق احمدؔ

کیا ہے اس کی دوا نہیں معلوم

 

احمدؔ ارسلان 

کشتواڑ، جموں و کشمیر

موبائل نمبر؛7006882029