کوئی نہ آئے گا تو انتظار مت کرنا
کہا تھا دل نے یہ مجھ سے کہ پیار مت کرنا
تُو مسکرا کہ یہی دن ہیں مسکرانے کے
غمِ حیات سے دل سو گوار مت کرنا
مسرتوں کو بھی حاصل نہیں ثبات یہاں
مسرتوں سے یہ دل ہم کنار مت کرنا
ہے فہم کس کو جو دِل کا معاملہ سمجھے
کسی کی یاد میں دل بے قرار مت کرنا
وہ جس کو ہو نہ شعورِ وفا ذرا سا بھی
وفا شعاروں میں اس کا شمار مت کرنا
سکونِ زندگی جس کی نظر میں کچھ بھی نہیں
سکونِ زیست تو اُس پر نثار مت کرنا
وہ شخص جس کو وفا کا نہیں ذرا بھی شعور
تُو اس کا ذکر یہاں بار بار مت کرنا
پرکھ کسی کو نہ ہو پیار کی جہاں اے دوست
وفا جتا کے یہاں خود کو خوار مت کرنا
ہر ایک شخص ہے خود اپنے راستے پہ رواں
یہاں کسی کا بھی تو انتظار مت کرنا
ہے اپنے رستے پہ ہر شخص گام زن عارفؔ
یہاں کسی کا بھی تو انتظار مت کرنا
عرفان عارفؔ
صدر شعبہ اردوایس پی ایم آر کالج آف کامرس جموں
موبائل نمبر؛09682698032
پَل بھر میں برسوں کا رشتہ توڑ دیا
پتھر ِدل نے آخِر شیشہ توڑ دیا
دیکھ کے اُسکو، پھِر دانستہ دیکھ لیا
اِک لغزش نے میرا روزہ توڑ دیا
شاید اُسکی فطری غیرت جاگ اُٹھے
ہم نے اِک سائل کا کاسہ توڑ دیا
جھوٹ میں آخر اِتنی طاقت کیوں آئی
اِک ساعت کو سچ کا لہجہ توڑ دیا
اپنی اِس جُرأت پر حیرت ہے مجھکو
خواب میں میںنے تجھ سے رشتہ توڑ دیا
رئیس ؔ صِدّیقی
سابق آئی بی ایس افسرآکاشوانی و دوردرشن
موبائل نمبر؛9810141528
ستم یوں مجھ پر وہ کررہا ہے
یہ من پسند اس کا مشغلہ ہے
قصور اپنا بتارہا ہے
نسب کا لگتا وہ بھلا ہے
اسے کبھی یار مت سمجھنا
قدم پہ حاجت سے گر پڑا ہے
کروانا! الفت کی بات پھر سے
عناد میں نہیں کوئی مزا ہے
کرم کریں یا ستم کریں وہ
غریب دل صبر آزما ہے
نہیں ہے قاتل یہاں تو کوئی
لہو کا دریا یہ کیوں بہا ہے ؟
سبھی کے لب پہ وفا کے نغمے
بتا کہ پھر کون بے وفا ہے؟
وہ کیسے جھک جائے عاجزی سے
جو بے ثمر اک شجر کھڑا ہے
محال ہے غم چھپا کے جینا
وجودِ ناؔزاں الم نما ہے
جبیں نازاں
لکشمی نگر، نئی دہلی
[email protected]
یہ کھیل سارا نصیب کا ہے
کہ سال اچھا رقیب کا ہے
سڑک کنارے پڑا ہے ہر سو
یہ مال شاید غریب کا ہے
جو درد پھر سے اُٹھا ہے دل میں
وہ درد میرے نصیب کا ہے
شفا عطا ہو گئی اگر تو ؟
یہ مشغلہ کیا طبیب کا ہے
ہوئی ہے اَن بَن ہماری تُم سے
سرور میں دل رقیب کا ہے
ہوئے ہیں برہم وہ وصل کی شب
دماغ اس میں رقیب کا ہے
ہمارے ہاتھوں میں آج تک اک
کہ کھوٹا سکہ نصیب کا ہے
جسے غنیمِ زماں نے لُوٹا
مکاں وہ ساگرؔ غریب کا ہے
ساگر سلام
کوکرناگ
[email protected]
پھول ارمانوں کے کِھلے خواب میں
شب کو ہم سے جب وہ ملے خواب میں
اس اداء سے آکے ملے خواب میں
داغ ہائے قلب دُھلے خواب میں
پیار کے، الفت، محبت، لطف کے
کیسے کیسے ورق کُھلے خواب میں
جونہ بیداری میں کرپایا کبھی
کرلئے وہ شکوے گِلے خواب میں
تم سے نہ بولیں گے صورتؔ کہدیا
کتنے دنوں بعد ملے خواب میں
صورت ؔسنگھ
رام بن، جموں
موبائل نمبر؛9622304549
حقیقتِ وفا اپنی تو یونہی بہانے سے پوچھ
کون ہے تیرے نام سے بد نام زمانے سے پوچھ
سمیٹنا دامن ہر بار تیرا ابتدائے بے رخی سے
کیا ہے با حوش بکھرنا دیوانے سے پوچھ
یہ اشک داروں میں بھی لگتے ہونگے کم ہی
اِک بوند بارش ہی بھگونا آشیانے سے پوچھ
معمولِ حجر بے سنجیدہ خودی کو بہل کے
مرگِ کردار کا غم کسی افسانے سے پوچھ
قدم قدم پہ تازگی کی تعریفِ پُر کشش پہ
شبنم کے وصل کا منظر ویرانے سے پوچھ
فاحد احمد انتہاؔ
واگہامہ بجبہاڈہ اننت ناگ
موبائل نمبر؛9906161667
جیت سچ کی ہوتی ہے ہر بار دیکھنا
اور جھوٹ ہو جاتا ہے شرمسار دیکھنا
ہوتی ملمع سازی کی ہے عمر کم قلیل
ہوجائے حقیقت جب آشکار دیکھنا
اپنا متاع دِل لئے جائینگے ہم وہاں
ہم بھی تو ہیں یوسف کے خریداردیکھنا
پھل پھولتی نہیں ہیں کبھی ظلم کی شاخیں
آئے جب عدل برسراقتدار دیکھنا
کوچۂ جاناں میں لگے کشتوُں کے پُشتے
ہر چپّہ وہاں کا ہوا گُلنار دیکھنا
بازیچۂ اطفال نہیں عشق ہے نیّرؔ
سوبار چڑھنا ہوگا سرِدار دیکھنا
غلام نبی نیّر
کولگام،کشمیر
موبائل نمبر؛ 9596047612
