عظمیٰ یاسمین
تھنہ منڈی// عید الاضحیٰ 2024 کی آمد آمد ہے۔ اس موقع پر قصبہ تھنہ منڈی کے اطراف و اکناف میں سارا دن خوب چہل پہل رہتی ہے۔ عوام کے بھاری رش کو دیکھ کر ایسا لگ رہا تھا کہ یہ مبارک عید تھنہ منڈی کی رونقیں بھی ہمراہ لے آئی ہے۔اس حسین و جمیل موقع پر علاقہ بھر کے لوگ عید کی تیاریوں میں مصروف نظر آئے۔ چاروں طرف اشیائے خرد و نوش اور دیگر ملبوسات کی خرید و فروخت کا سلسلہ دن بھر جاری رہتا ہے۔ چار سو گہما گہمی ہر طرف خرید و فروخت اور مقدس تہوار کی زوروں پر ہے۔ خواتین کو چوڑی مہندی کی فکر ہے تو کوئی بچوں کے کپڑوں کی خریداری میں مصروف ہے، بازاروں میں لگی رونق سے دکاندار بھی مطمئن ہیں، کہتے ہیں کہ تھنہ منڈی قصبہ میں معمول سے ہٹ کر رات گئے تک چہل پہل جاری رہتی ہے۔ اس سلسلے میں تھنہ منڈی کا مین بازار، خان مارکیٹ، اولڈ تھنہ منڈی، غزالی مارکیٹ، عبد مارکیٹ، اور خواجہ عبداللطیف شال مارکیٹ میں لگاتار خرید و فروخت کا سلسلہ جاری ہے۔ وہیں جوں جوں عیدالاضحیٰ کا مبارک دن قریب آتا جارہا ہے جا ہے، قصبہ تھنہ منڈی کی رونقوں میں بھی اضافہ ہوتا جارہا ہے۔ عید کے جشن کے لئے سجے بازار میں چاند رات نزدیک آتے ہی رونق آگئی ہے۔ 17جون 2024 کو عیدالاضحٰی منائی جارہی ہے اس کے چلتے ان دنوں تھنہ منڈی بازار میں بھاری رش دیکھنے کو مل رہا ہے اور پورا دن بازار خریداروں سے بھرا رہتا ہے۔ تاہم خریداروں کی الٹی گنتی شروع ہوچکی ہے۔ اپنوں کے ساتھ عید کا جشن منانے کیلئے بازار میں چہل پہل بڑ ھ گئی ہے۔ عورتیں ہوں یا مرد، ہر کوئی کپڑوں کی دکان پر اپنی پسند کے کپڑے خریدنے کیلئے کوشاں ہیں۔ یا دیگر اشیاء خرد و نوش کی خرید و فروخت میں مصروف ہیں۔ وہیں بعض صارفین کا کہنا تھا کہ قصبہ میں اشیائے خوردونوش اور ملبوسات کی قیمتوں میں بے پناہ اضافہ کر دیا گیا ہے جس کی وجہ سے عام اور غریب انسانوں کو خرید و فروخت میں کئی طرح کی مشکلات کا سامنا کرنا پڑ رہا ہے۔ انہوں نے تحصیل انتظامیہ سے اپیل کرتے ہوئے کہا کہ ابھی عید کہ اس مبارک موقع پر فوری طور پر پورے بازار کا معائنہ کیا جائے اور تمام دکانداروں پر کڑی نظر رکھی جائے تاکہ صارفین کو ضروریات زندگی کا سامان سستے داموں دستیاب ہو سکے۔ اور وہ دو دو ہاتھوں لٹنے سے بچ سکیں۔
ڈگری کالج گراؤنڈ پونچھ میں مویشی منڈی سج گئی
حسین محتشم
پونچھ//پوری دنیا کی طرح جموں و کشمیر کے سرحدی ضلع پونچھ میں بھی عید الاضحی کی تیاریاں عروج پر ہیں۔اس دوران پونچھ میں قربانی کے جانوروں کی عارضی منڈی سج گئی۔پونچھ شہر خاص میں عید الاضحی کے موقع پر عارضی مویشی منڈی شری کرشن چندر میموریل گورنمنٹ ڈگری کالج پونچھ کے گراؤنڈ میںقائم کی گئی ہے ۔یہاں ہر طرح کے قربانی کے جانور دستیاب ہیںتاہم تاجر سہولیات کے فقدان کا شکوہ کرتے نظرآتے ہیں۔اپنے جانور بیچنے آئے ہوئےایک شہری نے بات کرتے ہوئے کہا کہ وہ کئی دہائیوں سے جانوروں کو پالتے ہیں اور عید قربان کی آمد پر جانوروں کو فروخت بھی کرتے ہیں ،تاہم اب ان کو اس میں کوئی خاص فائدہ نہیں ہو رہا ہے۔آزاد چوہان نامی ایک شخص کا کہناتھا ’آج میں اس منڈی میں قربانی کا جانور خرید نے آیا تھا ،لیکن قیمتیں ساتویں آسمان پر ہیں ،آج سے تین سے قبل میں 150سے200روپے قر بانی کے جانور فی کلو فروخت کیا کرتا تھا ،لیکن اب قیمتوں میں بہت زیادہ اضافہ ہو گیا ہے۔تاہم قربانی کے جانور فروخت کرنے والے ایک اور تاجر نے کہا کہ منڈی میں قربانی کے جانوروں کی قیمتیں جانور کی نسل پر مقرر کی گئی ہے ۔انہوں نے کہا کہ منڈی میں قربانی کے جو جانور فروخت کئے جاریے ہیں وہ اعلیٰ نسل کے بھیڑ بکری ہیں ،جن میں کاجو ،چتری ،گرولہ اور کانگڑا قابل ذکر ہیں۔
