عظمیٰ نیوزسروس
جموں//چیف سیکرٹری اتل ڈلو نے ایک اعلیٰ سطحی میٹنگ کی صدارت کی جس میں جموں و کشمیر کے تاریخی و شاندار ورثے اور تعمیراتی ورثے کی بحالی ، تحفظ اور دیکھ دیکھ کی کوششوں کا جائزہ لینے اور عمل تیز کرنے پر تبادلہ خیال کیا گیا۔دورانِ میٹنگ چیف سیکرٹری نے قیمتی مخطوطات (قدیم تحریری دستاویزات) کی ڈیجیٹائزیشن کے لئے ایک مراعاتی پالیسی مرتب کرنے کے حوالے سے متعدد اہم ہدایات جاری کیں۔اُنہوںنے زور دیا کہ اس عمل میں تعاون کرنے والے افراد کو تسلیم کیا جائے اور ڈیجیٹائزیشن کے بعد ان کے اصل مخطوطات واپس کئے جائیں تاکہ عوام کی زیادہ سے زیادہ شمولیت کو یقینی بنایا جا سکے۔ میٹنگ میں مختلف فن تعمیر اور ثقافتی ورثہ کے تحفظ کے منصوبوں کی موجودہ صورتحال کا جائزہ لینے کے بعد محکمہ آرکیولوجی و آرکائیوز کو ہدایت دی گئی کہ وہ بحالی کی کوششوں کو تیز کریں اور جاری کردہ فنڈز کا مؤثر اِستعمال کریں تاکہ مقررہ مدت میں منصوبے مکمل کئے جا سکیں۔ اِس اقدام سے جموں و کشمیر کے تاریخی اور ثقافتی ورثے کے تحفظ کے عمل کو مزید فروغ ملے گا۔مبارک منڈی ہیرٹیج کمپلیکس کی ثقافتی بحالی کے حوالے سے صوبائی کمشنر جموں کو ہدایت دی گئی کہ وہ اکیڈیمی آف آرٹ، کلچر اینڈ لنگویجز کے اِشتراک سے ثقافتی تقریبات کا اِنعقاد کریں تاکہ مبا رک منڈی ہیرٹیج کمپلیکس کو ایک متحرک ثقافتی مرکز میں تبدیل کیا جا سکے۔چیف سیکرٹری نے ایم ایم ایچ سی میں بحال شدہ عمارتوں کے مؤثر اِستعمال پر زور دیتے ہوئے محکمہ آرکیالوجی کو ان عمارتوں کے دوبارہ استعمال کا ایک جامع منصوبہ تیار کرنے کی ہدایت دی ۔ اُنہوں نے واضح کیا کہ اگر بحال شدہ ڈھانچوں کو اِستعمال میں نہ لایا گیا تو اب تک کی گئی بحالی کی کوششوں کو نقصان پہنچے گا۔ اُنہوں نے کہا کہ ایسی عمارتوں کو غیر فعال رکھنا انہیں دوبارہ خستہ حالی کا شکار بنا سکتا ہے جو کسی بھی صورت قابل قبول نہیں۔ اِس کے علاوہ چیف سیکرٹری نے مبارک منڈی میں ہیرٹیج ہوٹل کے قیام کے لئے ٹرانزیکشن ایڈوائزر (ٹی اے) کی تقرری کے معاملے میں متعلقہ حکام کو ہدایت دی کہ وہ فائنانس ڈیپارٹمنٹ سے رہنمائی حاصل کریں۔ اس منصوبے کو پبلک پرائیویٹ پارٹنرشپ (پی پی پی) ماڈل کے تحت ڈیزائن، تعمیر، فائنانس ،آپریٹ اور ٹرانسفر (ڈِی بی ایف او ٹی) بنیاد پر تیار کیا جائے گا تاکہ جموں شہر میںدیرپا سیاحت کو فروغ دیا جا سکے۔اَتل ڈلو نے خطے کے ثقافتی ورثے کو فروغ دینے کے لئے جموںوکشمیر کی ثقافتی شناخت کے تحفظ میں نمایاں خدمات انجام دینے والوں کے لیے ایوارڈز دینے کی تجویز دی۔ اُنہوں نے لَل دَید جیسے سنتوں، صوفی بزرگوں کی زندگی اور خدمات پر مبنی مصوری مقابلے منعقد کرنے کی تجویز دی تاکہ نوجوان نسل کو ہمارے ورثے اور روایات کی جمالیاتی قدر اُجاگر کرنے اور تاریخی اہمیت سے روشناس کیا جا سکے۔چیف سیکرٹری نے ایس پی ایس میوزیم سری نگر کی جدید کاری کے لئے تفصیلی پروجیکٹ رِپورٹ کی تیاری میں ہونے والی پیش رفت کا بھی جائزہ لیا اور اسے 15دِنوں کے اَندر حتمی شکل دینے کی ہدایت دی ۔اُنہوں نے آئندہ موسم گرما میں اس کام کو اَنجام دینے پر زور دیا۔میٹنگ میں ورثے سے متعلق اہم منصوبوں کا بھی جائزہ لیا گیا جن میں شیرگڑھی پیلس کی بحالی و ترقی، تہذیب محل کی تعمیر، 250 میٹر طویل فلائی اوور برج (جو جلاکہ محلہ کو مبارک منڈی ہیرٹیج کمپلیکس سے جوڑے گا) کی 23.50کروڑ روپے کی لاگت سے تعمیر، کیبل کار پروجیکٹ (پیرکھو) اور مبارک منڈی کمپلیکس کے درمیان ورٹیکل لفٹ کی تنصیب اور ہیرٹیج کمپلیکس کے لئے جموں میونسپل کارپوریشن کے تحت ایک مخصوص پارکنگ ائیریا کی تعمیر شامل ہیں۔اِس موقعہ پر چیف سیکرٹری نے آئی ٹی ڈیپارٹمنٹ کو ہدایت دی کہ وہ ایک آن لائن پورٹل تیار کرے جس میں یوم آئین اور سردار ولبھ بھائی پٹیل کی 150ویں جینتی کی تقریبات کے تحت تمام اَضلاع میں ہونے والی سرگرمیوں کا دستاویزی ریکارڈ اور تشہیر کی جا سکے۔
