یو این آئی
تل ابیب//ایران کی جانب سے اسرائیل پر میزائل حملوں کی تازہ ترین لہر کے آغاز کے بعد متعدد عمارتیں کھنڈر میں تبدیل ہوگئیں، ایرانی حملے کے بعد اسرائیل میں غزہ جیسے مناظر دیکھنے کو مل رہے ہیں۔غیر ملکی ذرائع ابلاغ کے مطابق ایران کی جانب سے اسرائیل پر میزائل حملوں کے بعد تل ابیب، حیفہ، بیت یام اور دیگر علاقوں میں متعددعمارتیں کھنڈربن گئیں۔رپورٹس کے مطابق ایرانی حملے کے نتیجے میں حیفہ میں آئل ریفائنری، اہم سائنسی تحقیقی مرکز ویزمان انسٹی ٹیوٹ کونقصان پہنچے کی اطلاعات ہیں، بیت یام میں ایرانی میزائل حملے کے بعد متعدد عمارتیں تباہ ہوگئیں۔عرب میڈیا کا کہنا ہے کہ ایرانی حملوں میں 4 اسرائیلی ہلاک، درجنوں زخمی ہوئے ہیں، ایرانی حملوں میں تل ابیب اور حیفہ کو نشانہ بنایا گیا۔اسرائیلی میڈیا کا کہنا ہے کہ وسطی اسرائیل میں ایرانی حملوں میں ہلاکتیں ہوئیں، مختلف مقامات سے 87 زخمیوں کو اسپتال منتقل کیا گیا ہے ۔ایران کی جانب سے اسرائیل پر میزائل حملوں کی تازہ ترین لہر کے آغاز کے بعد حیفہ پاور پلانٹ میں آگ بھڑک اٹھی ہے ۔دی گارڈین کے مطابق برطانوی میری ٹائم سیکیورٹی فرم ایمبرے نے کہا ہے کہ ایرانی فورسز کی جانب سے شمالی شہر کے بندرگاہی انفراسٹرکچر پر بیلسٹک میزائل حملے ہوئے ہیں، جس کے بعد حیفہ کے قریب ایک پاور پلانٹ میں آگ بھڑک گئی۔اسرائیلی میڈیا کے مطابق ایرانی حملوں کے بعد مقبوضہ بیت المقدس میں بھی دھماکے سنے گئے ، جب کہ حیفہ پاور پلانٹ میں ایرانی میزائل حملے کے بعد آگ بھڑک اٹھی، بعض ایرانی میزائل تل ابیب کی عمارتوں پر بھی گرے ، ایرانی میڈیا کا کہنا ہے کہ حیفہ پاور پلانٹ پر میزائل حملے کے نتیجے میں وسطی اسرائیل میں بجلی بند ہو گئی ہے ۔واضح رہے کہ اسرائیل اور ایران نے ایک دوسرے کے خلاف اپنے حملے وسیع کر دیے ہیں، دونوں ممالک کے درمیان تنازع چوتھے دن میں داخل ہو گیا ہے ، اب تک اس پھیلتی ہوئی جنگ میں سینکڑوں افراد ہلاک اور زخمی ہو چکے ہیں۔
