نیوز ڈیسک
نئی دہلی//این آئی اے کی ایک خصوصی عدالت نے پیر کو کہا کہ وہ کشمیری علیحدگی پسند لیڈر یاسین ملک اور دیگر کے خلاف عسکری فنڈنگ کے معاملے میں 18اپریل کو باضابطہ الزامات طے کرے گی۔
19مارچ کو سماعت کی آخری تاریخ پر، عدالت نے لشکر طیبہ (ایل ای ٹی) کے بانی حافظ سعید، حزب المجاہدین کے سربراہ سید صلاح الدین اور دیگر کے خلاف مجرمانہ سازش رچنے، ملک کے خلاف جنگ چھیڑنے اور دیگر غیر قانونی سرگرمیوں کے الزامات عائد کرنے کا حکم دیا تھا۔
کشمیری علیحدگی پسند لیڈران جن میں یاسین ملک، شبیر شاہ، مسرت عالم، سابق ایم ایل اے راشد انجینئر، تاجر ظہور احمد شاہ وتالی، بٹہ کراٹے، آفتاب احمد شاہ، اوتار احمد شاہ، نعیم خان، بشیر احمد بٹ عرف پیر سیف اللہ اور کئی دیگر شامل ہیں۔ مجرمانہ سازش، ملک کے خلاف جنگ چھیڑنے اور دیگر غیر قانونی سرگرمیوں کے الزامات کے تحت بھی فرد جرم عائد کی گئی۔
16مارچ کے حکم میں، این آئی اے کے خصوصی جج پروین سنگھ نے کہا تھا،”مذکورہ تجزیہ اس بات کی عکاسی کرتا ہے کہ گواہوں کے بیانات اور دستاویزی ثبوتوں نے تقریباً تمام ملزمین کو ایک دوسرے سے اور علیحدگی کے ایک مشترکہ مقصد سے جوڑ دیا ہے۔ اس کا مطلب ہے کہ وہ پاکستانی اسٹیبلشمنٹ کی رہنمائی اور فنڈنگ کے تحت عسکری تنظیموں کے ساتھ ان کی قریبی وابستگی کو استعمال کرنا چاہتے تھے۔
واضح رہے کہ عدالت نے کامران یوسف، جاوید احمد بھٹ اور سیدہ آسیہ فردوس اندرابی کو بری کر دیا ہے۔
یہ معاملہ جموں و کشمیر کے حالات خراب کرنے کی سرگرمیوں کے متعلق عسکری اور علیحدگی پسندوں سمیت مختلف عسکری تنظیموں لشکر طیبہ ، حزب المجاہدین ، جموں و کشمیر لبریشن فرنٹ اور اسلامک اسٹیٹ کی حمایت یافتہ جیش محمد سے متعلق ہے۔
