میری جو بھی کہانی ہے
محفل کو یہ سُنانی ہے
شاعرکو اگر کہانی کار کہا جائے‘ جو منظوم پیرائیہ میں اپنے احساسات وجذبات کو شعرکے پیکر میں پیش کرتا ہے تو سامع یا قاری محفل کی مانند بن جاتاہے‘ یعنی ا لفاظ یاآواز اور قرأت یا سماعت کی محفل۔انگریزی شاعر Roger Turner ایک نظم ’’I am The Story Teller‘‘ میں لکھتا ہے :
Listen to me people
I'll take you on a journey
To places far away
Hold on tight and listen
From my mind
To yours today
(لوگو! میری بات سنو‘میں تمہیں ایک سفر پر لے جارہاہوں‘دوردراز جگہوں پر‘صبر کرو اور سنو‘میرے دماغ سے‘تمہارا آج کا حال)
دراصل ایک شاعر بھی اپنے کلام کے توسطہ سے خیالات و تصورات کی کہانی ہی سناتا ہے لیکن منثورحکایتی انداز سے نہیں بلکہ فکر و فن کے مخصوص شعری اسلوب میں۔ جیسے یہ اشعار دیکھیں ‘جنہیں میر تقی میرؔ سے منسوب کیا جاتا ہے ۔ ان میں بھی دلی کی بربادی کی غم انگیز کہانی ہی تو شعری اسلوب میں بیان ہوئی ہے۔:
کیا بود و باش پوچھو ہو یورپ کے ساکنو
ہم کو غریب جان کے ہنس ہنس پکار کے
دلی جو ایک شہر تھا عالم میں انتخاب
رہتے تھے منتخب ہی جہاں روزگار کے
اس کو فلک نے لوٹ کے برباد کردیا
ہم رہنے والے ہیں اسی اُجڑے دیار کے
یہ توضیحی تمہیدباندھنے کا محرک پیارے ہتاشؔ کے پیش نظرشعری مجموعہ’ ’عذاب در عذاب‘‘ کا مطالعہ بنا۔ میں سمجھتا ہوں جب تک نہ قاری کسی تخلیق (شعر/فکشن)میں پوشیدہ دردوکرب یا موضوعاتی گہرائی کے احساس کو محسوس کرسکے‘ تب تک اس تخلیق کی مناسب تفہیم یا تجزیہ مکمل نہیں ہوسکے گا اور یہی دردوکرب پیارے ہتاشؔ کے سبھی آٹھ شعری مجموعوں’’لمحات گمشدہ‘‘’’ کربِ وجود‘‘’’گردشِ ایام‘‘’’ یادِ زعفران‘‘ ’’لہولہو آنگن‘‘ ’’حال ِ زار‘‘’’سبزہ سے صحرا تک ‘‘ اور ’’عذاب در عذاب ‘‘کے بیشتر اشعار میں نظر آتا ہے ۔ مجموعہ ’’سبزہ سے صحرا ‘‘ تک کا استعاراتی نام کچھ زیادہ ہی دل کو چھوجاتا ہے کیونکہ اس میں سبزہ (کشمیر) سے صحر ا (جموں)کے نشیب وفراز کو دلنشیں شعری اسلوب میں پیش کیا گیا ہے۔جیسے کشمیر کے پُرآشوب ماحول ‘جہاں بہار میں بھی خزاں سا موسم بنایا جاتا ہے ‘ کی عکاسی ان اشعار میں دیکھیں:
گلستاں میں خیمہ زن ہے خزاں
ایسے میں کیا خاک آئے گی بہار
انتظار اس کا ہمیں مدت سے ہے
رنگ کب اپنا دکھائے گی بہار
اور اس بہار کے انتظار میں کشمیریوں کی تین دہائیاں بیت گئیں۔اب پیش نظر مجموعہ’’عذاب درعذاب‘‘ میں پوشیدہ شاعر کے ذہنی کرب اور قلبی درد کی کہانی کی طرف توجہ دیں تواس میں وہ خود اسی حقیقت کی طرف اشارہ کرتے ہوئے فرماتے ہیں:
میری جو بھی کہانی ہے
محفِل کو یہ سُنانی ہے
یعنی جو بھی کہانی ہے وہ اگرچہ میری اپنی کہانی محسوس ہوتی ہے اور وہی محفل کو سنانی ہے تاہم یہ ہم سب کی کہانی ہے‘ لیکن کس طرح ؟ شعر میں۔۔۔شاعری میں اور جب قاری ’’عذاب درعذاب‘‘ کے کلام کی کہانی پڑھنا شروع کرتاہے تو اس کے احساسات اور جذبات بھی شاعر کے عذاب درعذاب کی کہانیوں کے کرب کاحصہ بن جاتے ہیں۔یہ عذاب کئی قسم کے ہیںجو شاعر کے وجودی کرب سے نکل کرشعر کے قالب میں ڈھل گئے ہیں ۔ ان میں سب سے بڑھا عذاب اپنے گلشنِ وطن کشمیر سے ہجرت کرکے جموں یا دوسری جگہوں پر مقیم مہاجر ین کا وہ روحانی کرب ہے جو وہ پچھلے کئی برسوں سے جھیلتے آرہے ہیں اور جس میں خود شاعر بھی شامل ہیں۔شاعرنے دردانگیز اسلوب میں اس عذاب کو شعری پیکر میں ڈھالا ہے اور اشاروں کنایوں میں ان سازشی عناصر کے نفرت انگیز عزائم کی کہانی بھی سنائی ہے‘ جنہوں نے سیاسی اور مذہبی منافرت پھیلا کر کشمیر کے مثالی بھائی چارے کوریزہ ریزہ کرکے رکھ دیا اور کشمیرمیں خوف وہراس پھیلا کر کشمیری پنڈتوں کو وادی چھوڑنے پر مجبور کردیا۔نہیں تو آج بھی جب کوئی کشمیری پنڈت واردِکشمیر ہوتا ہے تو اپنے آبائی علاقے میں پہنچتے ہی مسلمان برادری دل سے اسکا استقبال کرکے مثالی مہمان نوازی کا حق ادا کرتی ہے۔اسی قسم کی داستان ستم شاعر درج ذیل اشعار میں سناتا ہے اور وادی سے چلے جانے کے بعد وادی کی کمی محسوس کرتے ہوئے زندگی کی حقیقی خوشی سے محروم ہونے کے کرب کا اظہار کرتا ہے؛
ہوتی ہے محسوس وادی کی کمی
زِندگی سے دور ہے ہر اِک خوشی
لوگ اُڑاتے رہتے ہَیں میری ہنسی
حیراں ہوں گے بات سُن کر آپ بھی
یاد کرتا ہے اَپنی وادی کو
جِس کو بھی دیکھتا ہُوں بے گھر ہے
یاد آتی ہے وادی کی
جہاں کٹا بچپن میرا
مجموعہ میں دردوکرب کے علاوہ نشاط انگیزخیالات‘لوگوں کے بدلتے رویے‘سیاسی حربے اور اخلاقی پیام کے حامل اشعاربھی نظر آتے ہیں‘ جو کہ شاعر کے گہرے مشاہدے ‘ اخلاقی اقدار کی پاس داری اور سیاست کے بدلتے رنگ کی عمدہ عکاسی کرتے ہیں:
یہ میری نِگاہوں کا تھا مُعجزہ
اگر چہرہ اُس کا نِکھرتا رہا
زباں اُس کی ہَر حال میں چُپ رہی
اِشاروں سے ہَر بات کرتا رہا
ہم سفر تھے کبھی وہ میرے ہتاشؔ
داستاں یہ بہت پرانی ہے
لوگ جو ہیں فریب کار یہاں
ہر گھڑی ٹیڑھی چال رکھتے ہیں
میری نظروں میں زندگی ہے وہ
دوسروں کے جو کام آئے گی
کیا بتاؤں میں سیاست دان کی
زندگی مرکوز ہے تقریر پر
اس کا منزل خود اڑائے گی مذاق
ہنستا ہے جو ہر کسی رہ گیر پر
مجموعہ ’’ عذاب در عذاب‘‘ میں شامل غزلیات کی قرأت سے دل محظوظ ہوجاتا ہے۔ کیونکہ آسان اسلوب میں شاعر اپنا پیام قاری تک پہنچانے میں کامیاب نظر آتا ہے۔ساری غزلیں تقریباََ سہل ممتنع میں ہیں‘ یعنی عام قاری کے لئے یہ کچھ زیادہ ہی دلچسپ کلام ہے۔ البتہ اب اگر شعری اور فنی موشگافیوں یا بلاغت کو زیر بحث لائیں تو اس کلام میں فکر وخیال کی ترسیل تو قابل ستائش ہے البتہ مثالی تخلیقی رچاؤ‘ تشبیہ واستعارہ اور علامت سازی جیسے تخلیقی اسالیب کی موجودگی خال خال ہی نظر آتی ہے۔ بہرحال‘ شعر تو خواص وعام کے لئے ہوتا ہے‘ اس لئے جسے پسند آئے شعر کامیاب کہلاتا ہے۔پیارے ہتاشؔ کے کلام کے خصائص کو اجاگر کرتے ہوئے پروفیسر حامدی کاشمیری دیباچہ’’یادِ زعفران‘‘ میں لکھتے ہیں:
’’۔۔۔۔ شعری اعتبار سے ان کے(پیارے ہتاشؔ) اشعار میں جہاں اُن کی فکروخیال کے خدوخال ابھرتےہیں وہیں اُن کے سادہ اور یک رنگ اشعار بھی ان کی شخصیت ہے جو سردوگرم زمانہ سے باخبر ہے۔‘‘
ہم نے کیا مانگا تھا کیا پایا ہتاشؔ
کس قدر افسوس ہے تقدیر پر
وڈی پورہ، ہندوارہ کشمیر
موبائل نمبر؛7006544358
