یواین آئی
نئی دہلی// ملک میں 1 لاکھ 75 ہزار 25 عازمین حج کی طبی دیکھ بھال کے لیے 356 ڈاکٹروں اور طبی عملے کو تعینات کیا گیا ہے اور تقریباً دو لاکھ او پی ڈی کا اہتمام کیا گیا ہے۔جمعہ کو ‘حج سفر کے لیے طبی دیکھ بھال کے انتظامات’ کے عنوان سے ایک دستاویز جاری کرتے ہوئے مرکزی وزارت صحت و خاندانی بہبود کے سکریٹری اپوروا چندرا نے کہا کہ اس سال ہندوستان سے 1,75,025 افراد نے فریضہ حج ادا کیا، جن میں سے تقریباً 40,000 افراد 60 سال سے زیادہ عمر کے ہیں۔ اس سال سعودی عرب کے نامساعد موسمی حالات کے پیش نظر صحت کے چیلنجوں کی وجہ سے عازمین حج کے لیے 24 گھنٹے خدمات کی ضرورت ہے۔ اس سال صحت کی خدمات میں دانتوں کی دیکھ بھال کو بھی شامل کیا گیا ہے۔ انہوں نے کہا کہ میڈیکل ٹیموں نے بھی عازمین حج سے رابطہ قائم کیا ہے۔جدہ میں ہندوستانی قونصلر محمد شاہد عالم نے آن لائن پروگرام میں شرکت کی۔ ان کے علاوہ ورلڈ ہیلتھ آرگنائزیشن ( ڈبلیو ایچ او ) کے نمائندے بھی موجود تھے۔ چندرا نے کہا کہ ایک پورٹل تیار کیا گیا ہے، جس میں طبی دیکھ بھال اور دیگر خدمات حاصل کرنے والے عازمین حج کی تفصیلات کو برقرار رکھا گیا ہے۔ اس کی مسلسل نگرانی کی جاتی ہے اور اس کی بنیاد پر خدمات کو بہتر بنایا جاتا ہے۔ یہ دستاویز صحت کی خدمات اور عازمین حج کے لیے ان خدمات سے استفادہ کرنے کے طریقہ کار کا خاکہ پیش کرتی ہے۔ وزارت صحت و خاندانی بہبود کے ایڈیشنل سکریٹری ایل ایس۔ چانگسان نے کہا کہ انہوں نے عازمین حج کی بڑی تعداد کے پیش نظر ایک جامع صحت کی دیکھ بھال کے منصوبے کی اہمیت پر زور دیا۔طبی دیکھ بھال کے انتظامات میں ہندوستان میں حج کے درخواست دہندگان کی صحت اور تندرستی کا اندازہ لگانے کے لئے استعمال ہونے والے طبی معائنے اور فٹنس سرٹیفکیٹ پر نظر ثانی کرنا، عازمین حج کو ان کے سفر اور سعودی عرب میں قیام کے لئے صحت کارڈ فراہم کرنا، ویکسینیشن کیمپوں میں اور ریاستوں میں ویکسین فراہم کرنا ، سعودی عرب میں مختلف مقامات پر ہیلتھ ڈیسک کا قیام، صحت کے عملے کی ڈیپوٹیشن اور طبی انفراسٹرکچر کا قیام شامل ہے۔
