گندو // ضلع ڈوڈہ کے مختلف مقامات پر جہاں پچھلے ایک دو مہینوں سے عورتوں کے بال کاٹنے کا سلسلہ تھمنے والا نہیں ہے وہیں خواتین و بچیاں اپنے ہی گھروں میں محفوظ نہیں ہیں۔تفصیلات کے مطابق ضلع ڈوڈہ کے مختلف علاقوں میں جہاں پچھلے کچھ عرصہ سے خواتین و بچیوں کے بال کاٹنے کے واقعات روز پیش آ رہے ہیں وہیں خواتین و بچیاں اپنے ہی گھروں میں اپنے آپ کو محفوظ نہیں سمجھ رہی ہیں۔ذرائع کے مطابق بھلیسہ کے علاقہ چالر میں بعد دوپہر شمیمہ بانو دختر فاروق احمد نائیک کے بال کاٹنے سے جواں لڑکی بے ہوش ہو کر گری پڑی کچھ ہی وقت کے بعد جب اہل خانہ گھر سے باہر نکلے تو انہوں نے لڑکی کو بے ہوشی کی حالت میں دیکھا اور اْسے پی ایچ سی جکیاس منتقل کیا گیا مگر اچانک راستہ میں ہوش آنے سے لڑکی کو گھر واپس لیا گیا۔ادھر چلی پینگل کے گاؤں پولی میں ایک بار پھر تحسینہ بانو دختر محمد امین بٹ کے بال کاٹے گئے جس کے ساتھ چند دن پہلے ایسا ہی واقع پیش آیا تھا۔ تحسینہ بانو جو کہ اپنے گھر کے باہر والدین کے ساتھ موجود تھی کہ اچانک گر پڑی جب ماں باپ نزدیک پہنچے تو انہوں نے لڑکی کے بال کٹے ہوئے دیکھے اور لڑکی کو بے ہوشی کے حالت میں مقامی لوگوں کی مدد سے سب ضلع ہسپتال گندو منتقل کیا گیا جہاں پر وہ زیرِ علاج ہیں۔
ضلع ڈوڈہ میں خواتین کے بال کاٹنے کا سلسلہ جاری
