یو این آئی
تہران //ایران نے اسرائیل پر تازہ میزائل حملوں میں صہیونی فوج کے کمانڈ اینڈ انٹیلی جنس ہیڈکوارٹرز اور انٹیلی جنس کیمپ کو نشانہ بنانے کا دعویٰ کیا ہے۔اسرائیل کی وزارت صحت کے مطابق کل صبح ایرانی بیلسٹک میزائل حملے کے بعد 271 افراد اسپتالوں میں پہنچے، جن میں سے 4 کی حالت تشویش ناک ہے، 16 کو درمیانے زخم اآئے ہیں، 220 کی حالت بہتر ہے، 24 افراد شدید ذہنی دباؤ (انگزائٹی) کا شکار ہیں، اور 7 افراد کی طبی جانچ جاری ہے جن کی حالت کا تعین ابھی نہیں ہو سکا۔میزائل کے براہ راست نشانہ بننے والے سوروکا میڈیکل سینٹر میں 71 افراد معمولی زخمی ہوئے اور ایک شخص کو ذہنی دباؤ کا سامنا کرنا پڑا۔زیادہ تر معمولی زخمی افراد اس وقت زخمی ہوئے، جب وہ محفوظ مقام کی طرف جا رہے تھے، یا ان پر ذہنی دباؤ کی کیفیت طاری تھی۔وزارت صحت کے مطابق، ’آپریشن رائزنگ لائن‘ کے آغاز سے اب تک 2 ہزار 345 زخمی افراد ہسپتالوں میں لائے جا چکے ہیں، جن میں سے 21 کی حالت تشویش ناک، 87 کی حالت درمیانی، 2 ہزار سے زائد کی حالت بہتر ہے، 99 افراد کو ذہنی دباؤ کا سامنا ہے۔اسرائیلی وزیراعظم نے ایران پر سوروکا ہسپتال کو نشانہ بنانے کا الزام عائد کیا ہے۔جمعرات کی صبح کیے گئے ایرانی حملے کے مرکزی اہداف اسرائیلی فوج کا کمانڈ اینڈ انٹیلی جنس ہیڈکوارٹرز اور سوروکا ہسپتال کے قریب واقع اسرائیلی فوج کا انٹیلی جنس کیمپ تھے۔روسی خبر رساں ادارے ’آر ٹی‘ نے ایران کے تازہ حملوں کے بعد اپنے ’ایکس‘ ہینڈل پر متعدد پوسٹس شیئر کی ہیں جن میں سوروکا ہسپتال اور تل ابیب اسٹاک ایکسچینج اور دیگر عمارتوں کو پہنچنے والے نقصانات کو دیکھا جاسکتا ہے۔ایرانی حملے کے بعد تل ابیب اسٹاک ایکسچینج سمیت دیگر عمارتوں کو خالی کرا لیا گیا۔تہران ٹائمز کے مطابق ایرانی حکام کا کہنا ہے کہ اسرائیلی فوج کے کمانڈ اینڈ انٹیلی جنس ہیڈکوارٹر کے علاوہ بییر شیبع میں واقع گیو یام ٹیکنالوجی پارک میں ایک فوجی انٹیلی جنس تنصیب میزائلوں کا ہدف تھی۔ایرانی حکام نے کہا ہے یہ علاقہ جنوبی اسرائیل کے بڑے طبی مراکز میں سے ایک، سوروکا میڈیکل سینٹر کے قریب واقع ہے، ذرائع نے تسلیم کیا ہے کہ دھماکے کی لہر سے ہسپتال کو معمولی نقصان پہنچا، لیکن یہ واضح کیا کہ فوجی تنصیبات ہی اصل اور درست ہدف تھیں۔دوسری جانب اسرائیلی میڈیا کے مطابق ایران کے میزائل حملے میں جنوبی اسرائیل کے شہر بیر شیبا میں سروکا ہسپتال کو نشانہ بنایا ہے، برطانوی جریدے دی ٹیلی گراف کے مطابق ایمرجنسی سروس کے سربراہہ کا کہنا ہے کہ حملے میں کم از کم 126 افراد زخمی ہوئے ہیں، ٹائمز آف اسرائیل کے مطابق ایرانی حملوں کے نتیجے میں 6 افراد شدید زخمی ہوئے ہیں۔اسرائیلی وزیرِاعظم بنجمن نیتن یاہو نے تازہ میزائل حملوں کے بعد سماجی رابطے کی ویب سائٹ ’ایکس‘ پر جاری کردہ بیان میں کہا ہے کہ ’آج صبح ایران نے بیئر شیبع میں سوروکا ہسپتال اور ملک کے وسطی حصے میں شہری آبادی پر میزائل داغے، ہم تہران کے ظالم حکمرانوں سے اس کا پورا حساب لیں گے‘۔اسرائیل کی مسلح افواج (آئی ڈی ایف) نے کہا ہے کہ جمعرات کی صبح (19 جون کو) ایران کی جانب سے داغا گیا کم از کم ایک میزائل متعدد گولا بارود (وار ہیڈز) یا کلسٹر بم کی قسم کا حامل تھا۔آئی ڈی ایف نے کہا ہے کہ ایران نے دعویٰ کیا ہے کہ اس کے پاس ملٹی پل انڈیپینڈنٹلی ٹارگیٹیبل ری انٹری وہیکلز (ایم ا?ئی ا?ر وی) بیلسٹک میزائل موجود ہیں، نیز دیگر ایسے میزائل بھی ہیں جن میں ذیلی گولا بارود (submunitions) شامل ہوتا ہے، جو ایک ہی میزائل کو کئی اہداف پر حملہ کرنے کے قابل بناتے ہیں۔مرکزی اسرائیل میں کی گئی تلاش کے دوران کئی چھوٹے گولا بارود کے ٹکڑے ملے، جس سے عندیہ ملتا ہے کہ ہوسکتا ہے ایسا میزائل استعمال کیا گیا ہے۔
