عظمیٰ نیوزسروس
کٹھوعہ//ڈویژنل کمشنر جموں رمیش کمار اور انسپکٹر جنرل آف پولیس جموں، بی ایس توتی نے بادل پھٹنے اور سیلاب سے متاثرہ علاقوں کٹھوعہ کے علاقوں کا ایک وسیع دورہ کیا تاکہ صورتحال کا جائزہ لیا جا سکے اور جاری امدادی اور بحالی کے اقدامات کا جائزہ لیا جا سکے۔سڈکو گھاٹی میں قائم ریلیف کیمپ میں ڈویژن کام نے جوڑھ علاقے کے متاثرہ خاندانوں سے ملاقات کی جہاں حالیہ آفت میں پانچ افراد اپنی جان سے ہاتھ دھو بیٹھے۔ انہوں نے بے گھر خاندانوں سے بات چیت کی، جانوں کے ضیاع پر گہری تشویش کا اظہار کیا اور تعزیت کا اظہار کیا۔انہوں نے متاثرین کو حکومت کی طرف سے ہر ممکن تعاون کا یقین دلایا اور بتایا کہ ریاستی ڈیزاسٹر رسپانس فنڈ کے تحت فوری مالی امداد پہلے ہی ضلع انتظامیہ کی طرف سے فراہم کی جا چکی ہے۔ انہوں نے ڈپٹی کمشنر کٹھوعہ کو ہدایت دی کہ وہ متاثرہ علاقوں میں سڑک کے رابطے کی جلد بحالی کو یقینی بنائیں۔ڈویژنل کمشنرنے دلوان گاؤں کا بھی دورہ کیا، جس میں سیلاب کی وجہ سے سڑک کے بنیادی ڈھانچے اور رہائش گاہوں کو کافی نقصان پہنچا۔ انہوں نے تعمیرات عامہ ،پی ایچ پی اورپی ڈی ڈی کے متعلقہ ایگزیکٹو انجینئروں کو ہدایت دی کہ وہ متاثرہ خاندانوں کی مشکلات کو کم کرنے کے لیے ضروری خدمات کی بحالی کے لیے قریبی تال میل سے کام کریں۔بعد ازاںصوبائی کمشنرنے گورنمنٹ میڈیکل کالج، کٹھوعہ کا دورہ کیا، جہاں انہوں نے جکھول اور جنگلوٹ کے زخمیوں سے ملاقات کی جنہیں علاج کے لیے داخل کیا گیا تھا۔ انہوں نے ان کی صحت اور طبی امداد کی فراہمی کے بارے میں دریافت کیا۔ انہوں نے جی ایم سی حکام اور ضلعی انتظامیہ کو ہدایت کی کہ وہ زخمیوں اور ان کے اہل خانہ کی بہترین ممکنہ علاج اور مناسب دیکھ بھال کو یقینی بنائیں۔ ڈپٹی کمشنر کٹھوعہ راجیش شرما نے صوبائی کمشنر کو بتایا کہ متاثرین کو مناسب طبی سہولیات اور تمام ضروری امداد فراہم کی جارہی ہے۔
