یو این آئی
سرینگر//صدر ہند دروپدی مرمو کے دورے کشمیر کے پیش نظر وادی کشمیر بالخصوص شہر سرینگر کے قرب و جوار میں سیکورٹی کا فقید المثال بندوبست کیا گیا ہے۔کشمیر یونیورسٹی کو فوجی چھاونی میں تبدیل کیا گیا ہے اور بغیر پاس کسی کو بھی یونیورسٹی کے اندر جانے کی اجازت نہیں دی جارہی ہے۔ بتادیں کہ صدر ہند آج کشمیر یونیورسٹی میں سالانہ کنونشن سے خطاب کریں گی۔صدر مرمو کے اس دورے کے پیش نظر حکام نے شہر سرینگر کے قرب وجوار میں سیکورٹی کے سخت انتظامات کئے ہیں اور کسی بھی ممکنہ ناخوشگوار واقعے کو ناکام بنانے کے لئے بھاری تعداد میں سیکورٹی اہلکاروں کو تعینات کیا گیا ہے۔
شہر کے تمام علاقوں میں سیکورٹی کے سخت انتظامات کئے گئے ہیں اور ناکوں کے جال کو مزید وسیع کر دیا گیا ہے۔ ہتھیاروں سے لیس سیکورٹی اہلکار انتہائی چوکنا ہیں۔ ناکوں پر مسافر بردار گاڑیوں کی بھی تلاشی لی جاتی رہی اور مسافروں کی بھی جامہ تلاشی اور ان کے شناختی کارڈ بھی چیک کئے جا رہے تھے۔ لالچوک ، بٹہ مالو ، جہانگیر چوک، ہری سنگھ ہائی اسٹریٹ ، ریگل چوک وغیرہ اور یونیورسٹی کی طرف جانے والی شاہرائوں پر جگہ جگہ ناکوں کا جال بچھایا گیا۔دریں اثنا کشمیر یونیورسٹی میں صدر ہند کی آمد کے پیش نظر کیمپس کو فوجی چھاونی میں تبدیل کردیا گیا ہے۔ کشمیر یونیورسٹی اور اس کے ملحقہ علاقوں میں پولیس ، سی آر پی ایف اور سی آئی ایس ایف کے اہلکار چپے چپے پر تعینات کئے گئے ہیں۔
