یو این آئی
غزہ// غزہ میں ہزاروں فلسطینیوں کو ہلاک کرنے کے بعد بھی اسرائیلی فوج کے مظالم کا سلسلہ تاحال جاری ہے ،عام عوام کے ساتھ ساتھ صحافیوں کی بھی بہت تعداد میں شامل ہے ۔عرب میڈیا کی رپورٹ کے مطابق اسرائیلی فوج کی بربریت کے نتیجے میں اب تک 176 صحافی ہلاک ہوچکے ہیں۔تازہ ترین رپورٹس کے مطابق غزہ کے علاقے جبالیہ میں صحافیوں پر میزائل حملے میں 1 صحافی ہلاک جبکہ دوسرا شدید زخمی ہوگیا، اسرائیلی فوج نے صحافیوں پر حملے کے بعد امدادی ٹیموں کو بھی نشانہ بنایا۔رپورٹ کے مطابق اسرائیلی فوج نے ایک عرب ٹی وی کے فلسطینی فوٹو گرافر کی گردن میں گولی مارکر ہلاک کردیا۔واضح رہے کہ غزہ میں بین الاقوامی صحافیوں کے داخلے پر بھی پابندی ہے اور وہاں کی صورتِ حال کی میڈیا کوریج کے لیے صحافیوں کے اجازت نامے اسرائیل نے روک دیئے ہیں۔رپورٹ کے مطابق غزہ میں ایک سال کی تباہی کے بعد بھی کسی بین الاقوامی صحافی کو غزہ جانے کے لیے اسرائیل نے اجازت نامہ جاری نہیں کیا۔
