کشمیری پنڈتوں کیلئے حفاظتی اقدامات کو بڑھایا جائیگا، وزارت داخلہ کو تجویز پیش:سنہا
جموں// لیفٹیننٹ گورنر منوج سنہا نے پیر کو کہا کہ مرکز کے زیر انتظام علاقے میں سیکورٹی کی صورتحال میں نمایاں بہتری آئی ہے اوریہاں دہشت گردی اپنی آخری سانسیں لے رہی ہے۔انہوں نے کہا کہ کشمیری پنڈت برادری سے تعلق رکھنے والے ملازمین کو رہائش کی ضروریات کے لیے وادی میں سستے داموں زمینیں فراہم کی جائیں گی۔سنہا نے جموں شہر کے مضافات میں ماتا بھدرکالی مندر میںپر کشمیری پنڈتوں سے خطاب کرتے ہوئے کہا کہ میں اعتماد کے ساتھ کہہ سکتا ہوں کہ دہشت گردی اپنی آخری سانسیں لے رہی ہے،سکیورٹی کی صورتحال ماضی کے مقابلے بہتر ہے۔ سنہا نے کہا کہ ماضی میں دہشت گردوں نے کمیونٹی کے اندر خوف پیدا کرنے کے لیے سافٹ مقامات کو نشانہ بنایا ۔
انہوں نے کہا کہ پڑوسی ملک جان بوجھ کر جموں و کشمیر میں دہشت گردی کی ہانڈی کو ابلتے رکھنے کی کوشش کر رہا ہے، ہم کشمیری پنڈتوں اور اقلیتوں سمیت کمزور گروہوں کی حفاظت کو یقینی بنانے کی ہر ممکن کوشش کر رہے ہیں۔ انہوں نے کہا کہ پولیس اور سیکورٹی فورسز اس مقصد کے لیے انتھک محنت کر رہے ہیں۔جموں میں مقیم ماتا بھدرکالی مندر، جو کہ شمالی کشمیر کے کپواڑہ ضلع میں واقع ایک مندر کی نقل ہے، نے مہا نومی منائی، جس میں ایل جی سنہا اور جموں کے مختلف حصوں سے کشمیری پنڈتوں نے شرکت کی۔سنہا نے کہا کہ کشمیری پنڈت برادری کے سرکاری ملازمین کو رہائش کے مقاصد کیلئے سری نگر میں رعایتی نرخوں پر زمین کی پیشکش کی جائے گی،ہم یقینی بنائیں گے کہ یہ انتظام فوری طور پر کیا جائے۔ انہوں نے کہا کہ میری انتظامیہ اور دفتر کمیونٹی کے لوگوں کے لیے ان کے حقیقی خدشات دور کرنے کے لیے کھلے ہیں۔انکا کہنا تھا کہ مزید برآں، کشمیر میں کشمیری پنڈت برادری سے تعلق رکھنے والے ملازمین کے لیے رہائش کا انتظام کیا گیا ہے، اور مختص کرنے کا کام تیزی سے مکمل کیا جائے گا۔لیفٹیننٹ گورنر نے کہا کہ کشمیر بھر میں ان رہائش گاہوں پر حفاظتی اقدامات کو بڑھایا جائے گا۔ انہوں نے مزید کہا کہ وزارت داخلہ کو ایک تجویز پیش کی گئی ہے اور ہمیں اس پر عمل درآمد کے لیے فوری جواب کی توقع ہے۔
