ڈوڈہ //پی ڈی پی کی طرف سے دعویٰ کیا گیا ہے کہ ڈوڈہ حلقۂ انتخاب کوٹی اور بھاگواہ علاقوں سے تعلق رکھنے والے متعدد سیاسی کارکنان نے پی ڈی پی میں شمولیت اختیار کی ہے۔ پارٹی کے ضلعی دفتر سے جاری ایک پریس ریلیز میں کہا گیا ہے کہ پارٹی کے ضلع صدر شہاب الحق بٹ اور دیگر پارٹی عہدیداران اور کارکنان کی موجودگی پارٹی کے ضلع صدر کی ڈوڈہ میں واقع رہائش گاہ گلستانِ جبین پر منعقدہ ایک مختصر سی تقریب میں پارٹی میں شمولیت اختیار کرنے والوں کا ہار پہنا کا خیر مقدم کیا گیا۔پی ڈی پی میں شمولیت اختیار کرنے کی وجہ بیان کرتے ہوئے ان لوگوں نے کہا کہ وہ مرحوم مفتی محمد سعید کے نظریے اور پارٹی کے ضلع صدر شہاب الحق بٹ کی عوامی خدمات اور اُن کے طریقۂ کار سے متاثر ہو کر پارٹی میںشامل ہوئے ہیں۔ اُنہوں نے کہا کہ مرحوم مفتی محمد سعید کا نظریے کو اپنا کر ہی جموں و کشمیر میں امن قائم ہو سکتا ہے اور اُنہیں یقین ہے کہ محترمہ محبوبہ مفتی کی قیادت میںریاست ترقی کی نئی منازل طے کرے گی۔اس موقع پر شہاب الحق بٹ نے پارٹی میں شمولیت کرنے والوں کو خوش آمد ید کہااور مبارک بادپیش کی کہ وہ صیح منزل پر آپہنچے ہیں کیوںکہ پی ڈی پی ہی واحد جماعت ہے جو ریاست کی خوشحالی تینوں خطوں کی ترقی اور ہندو ،مسلم، سکھ اتحاد کی قائل ہے۔اُنہوں نے کہا کہ جو لوگ ہمارے ساتھ شامل ہو رہے ہیں وہ محفوظ ہاتھوں میں ہیں اور جو توقعات اُنہوں نے پارٹی سے وابستہ کی ہیں پارٹی اُن پر پورا اُترنے کی پوری کوشش کرے گی۔اُنہوں نے کہا کہ پی ڈی پی محض ایک پارٹی ہی نہیں بلکہ ایک تحریک ہے جس کا مقصد ریاستی عوام کو مالی، تعلیمی، معاشی اور معاشرتی لحاظ سے خود کفیل بنانا اور مسئلہ کشمیر کا ایک قابلِ قبول اور پائدار حل نکالنا ہے۔اُنہوں نے کہا کہ موجودہ حکومت عوام کے مسائل کے حل کے لئے پُر عزم ہے اور محبوبہ مفتی کی قیادت میں حکومت وہ ہر ممکن قدم اُٹھا رہی ہے جس سے عوام کو راحت اور سہولیات فراہم ہوں۔ انہوں نے پارٹی کارکنان پر زور دیا کہ وہ عوام کے ساتھ نزدیکی رابطہ رکھیں اور آنے والے پنچایتی چنائو کے لئے کمر کس لیں اور بھر پور طریقے سے الیکشن میں حصہ لے کر پارٹی کو مضبوط سے مضبوط تر بنائیں ۔ پارٹی میں شمولیت اختیار کرنے والوں میں عنایت اللہ کھانجی ولدِ فتح کھانجی،عنایت اللہ کھانجی ولد ِ عبدالرشید کھانجی،،عبدالقیوم میر،شبیر احمد،اختر حسین میر،ظفراللہ لون،ایاز وانی،محمد حسین و دیگران شامل ہیں۔
سیاسی کارکنوں کی پی ڈی پی میں شمولیت کا دعویٰ
