عظمیٰ نیوز سروس
سرینگر//بی جے پی کے نیشنل ایگزیکٹیو ممبر اور جموں و کشمیر وقف بورڈ کی چیئرپرسن ڈاکٹر درخشاں اندرابی نے این سی، کانگریس اور پی ڈی پی پر دوبارہ اقتدار حاصل کرنے کیلئے اور کچھ ووٹ حاصل کرنے کے لیے جھوٹا بیانیہ پھیلا کر لوگوں کو گمراہ کرنے کیلئے تنقید کی۔ انہوں نے کہا کہ یہ خاندانی سیاستدان ہمارے ہزاروں نوجوانوں کے قتل کے ذمہ دار ہیں کیونکہ انہوں نے اقتدار میں رہنے اور بادشاہوں کی طرح برتاؤ کرنے کیلئے کئی دہائیوں تک ڈرامے کی سیاست کا سہارا لیا۔ انہوں نے کہا’’انتخابات میں دھاندلی ، ووٹروں کو دھمکیاں دینا، لوگوں کو اقتدار میں رہنے کیلئے خوف کا کلچر پروان چَڑھایا گیا۔ ہر الیکشن میں یہ افواہیں پھیلاتے ہیں، اقتدار میں رہنے کے لیے لوگوں کو گمراہ کرنے کے لیے جھوٹے بیانیے پھیلاتے ہیں۔ یہ خاندان جموں و کشمیر میں کئی دہائیوں سے جاری خونریزی اور افراتفری کے ذمہ دار ہیں‘‘۔
درخشاں اندرابی شوپیاں میں بی جے پی کی ایک انتخابی ریلی سے خطاب کر رہی تھیں۔ جموں و کشمیر کے بی جے پی الیکشن انچارج رام مادھو اور شوپیاں سے پارٹی کے امیدوار جاوید قادری بھی اس موقع پر موجود تھے۔ ڈاکٹر اندرابی نے کہا ’’ یہ خانوادے جموں و کشمیر میں لوگوں کی تکالیف اور ان کی پریشانیوں کے ذمہ دار ہیں۔سیاسی ڈرامہ بازی کا دور چلا گیا ہے۔ 2024 میں خاندانی سیاست غیر بے محل ہے لیکن یہ خاندانی رہنما اب بھی ایسے بول رہے ہیں جیسے وہ 1947 میں رہ رہے ہوں۔ جموں و کشمیر اب ایک بدلا ہوا خطہ ہے جہاں لوگ امن اور ترقی سے سرفراز ہو رہے ہیں‘‘۔ بعد ازاں ضلع پلوامہ کے نکس میں ایک اور انتخابی ریلی سے خطاب کرتے ہوئے ڈاکٹر اندرابی نے کہا کہ این سی کانگریس اور پی ڈی لیڈران 2008، 2010 اور 2016 کی ہلاکتوں اور آج کے کچھ واقعات کے درمیان فرق سمجھنے سے قاصر ہیں۔انہوں نے کہا’’یہ خاندانی سیاست دان اس حقیقت سے خوش نہیں ہیں کہ اقتدار سے باہر ہونے کے بعد اب کشمیر میں عام لوگوں کو روز روز مارا نہیں جا رہا ہے، اس لیے وہ جموں و کشمیر کی صورتحال کے بارے میں غیر منطقی اور بے ہودہ باتیں کرتے ہیں‘‘۔
