شوکت حمید
سرینگر// پی ڈی پی یوتھ لیڈر لیڈر اور ممبراسمبلی پلوامہ وحید پرہ نے کہا کہ آج سڑک پانی بجلی جیسے مسائل کی کوئی اہمیت نہیں ہے بلکہ دفعہ370کی واپسی اور عزت و قار کی بحالی چاہتے ہیں ۔انہوں نے الزام لگایا کہ نیشنل کانفرنس ضرورت پڑنے پر ہمیشہ دلی کا ساتھ دیتی آئی ہے ۔ ایوان کی کارروائی ملتوی کئے جانے کے بعد اسمبلی کے باہر نامہ نگاروں کے ساتھ بات کرتے ہوئے انہوں نے کہا کہ جس قرارداد میں دفعہ370اور 35اے کی بحالی، ریاستی درجے کی واپسی اور 5اگست 2019 کے فیصلوں کی پر زور مذمت کی گئی ہوگی ہم اس کی تائید کریں گے خواہ وہ نیشنل کانفرنس سے ہی کیوں نہ آئے ۔انہوں نے کہاکہ1947سے لے کر آج تک چاہئے اس ملک کو ریاست میں تبدیل کیا گیا اور پھر ریاست کو یونین ٹریٹری، وزیر اعظم کو وزیر اعلیٰ اور پھر گورنر کو لیفٹیننٹ گورنر بنایا گیا جب بھی مرکز کو ضرورت پڑی ہے تو نیشنل کانفرنس آگے رہی ہے۔وحید پرہ نے کہا کہ ہم ایوان میں لڑنے نہیں آئے تھے بلکہ نیشنل کانفرنس نے جب قرار داد پاس کی توہم ان کے ساتھ کھڑے رہے۔انہوں نے کہا کہ ہم نے جو پہلے دن قرار داد پیش کی تو اس پر قانون کی بات کی گئی، یہ لوگ دفعہ370 کی مانگ پر شاید خوف محسوس کر رہے ہیں۔پرہ نے کہا کہ آج مسئلہ سڑک، پانی، بجلی کا نہیں ہے بلکہ جموں و کشمیر کے لوگوں کے جذبات کا ہے لوگوں کو چاہئے کہ وہ ہم سب کو جواب دہ بنائیں۔ان کا کہنا تھا’’ہم نے جو آج قرار داد پیش کی اس پر رات دو بجے تک لوگوں کے ساتھ بات کی اگر نیشنل کانفرنس کی طرف سے ایسی قرار دا آئے جس میں میں دفعہ370اور 35اے کی بحالی، ریاستی درجے کی واپسی اور پانچ اگست2019 کے فیصلوں کی پر زور مذمت کی گئی ہوگی ہم اس کی تائید کریں گے ۔
