یو این آئی
نئی دہلی// سپریم کورٹ نے انڈر گریجویٹ میڈیکل اور دیگر کورسز میں داخلے کیلئے 5 مئی کو ہونے والے قومی اہلیت کم داخلہ ٹیسٹ (نیٹ یو جی) 2024 کو منسوخ کرنے سے پیر کو انکار کر دیا۔چیف جسٹس ڈی وائی چندرچوڑ اور جسٹس جے بی پارڈی والا اور منوج مشرا کی بنچ نے دوبارہ امتحان کی درخواستوں کو مسترد کرتے ہوئے کہا کہ جانچ کے دوران ایسا کوئی ثبوت نہیں ملا جس سے یہ ظاہر ہو کہ سوالیہ پرچہ عام کیا گیا تھا اور یہ بے ضابطگی امتحانات کا انعقاد کرنے والے ادارے نیشنل ٹیسٹنگ ایجنسی (این ٹی اے) کی نظامی ناکامی تھی۔تاہم بنچ نے کہا کہ اگر تحقیقات سے مستفید ہونے والوں کی تعداد میں اضافہ کا پتہ چلنے پر کونسلنگ کا عمل مکمل ہونے کے باوجود کسی بھی مرحلے پر ایسے کسی بھی طالب علم کے خلاف کارروائی کی جائے گی۔عدالت عظمیٰ نے یہ بھی کہا کہ کوئی بھی امیدوار دھوکہ دہی میں ملوث پایا جاتا ہے یا اس کا فائدہ اٹھانے والا ہے اسے اندراج جاری رکھنے کے لیے کسی مخصوص حقوق کا دعویٰ کرنے کا حق نہیں ہوگا۔
کرناٹک میں اب نیٹ امتحان نہیں ہوگا | تنازع کے درمیان کابینہ میںنئی بل منظور
عظمیٰ نیوز ڈیسک
بنگلورو// نیٹ کے حوالہ سے ملک بھر میں جاری ہنگامہ آرائی کے درمیان حکومت کرناٹک نے فیصلہ کیا ہے کہ اب وہ ریاست میں اس میڈیکل داخلہ امتحان کو منعقد کرنے کی اجازت نہیں دے گی۔ نیٹ پیپر لیک کے تنازعہ کے درمیان کرناٹک ایک کی کابینہ نے نیا بل منظور کر لیا ہے۔ کانگریس کی قیادت والی کرناٹک حکومت تمل ناڈو کے بعد نیٹ کو منسوخ کرنے کی تجویز کے بل کو منظوری دینے والی دوسری ریاستی حکومت بن گئی ہے۔کرناٹک میں منظور کیا گیا بل نیٹ کے بجائے کچھ اور میڈیکل داخلہ امتحان منعقد کرنے یا نیٹ کو کرناٹک میں کامن انٹرینس ٹیسٹ (سی ای ٹی) سے جوڑنے کی تجویز ہے۔ یہ بل کرناٹک قانون ساز اسمبلی میں پیش کیا جائے گا۔ اس میں حکومت سے درخواست کی گئی ہے کہ ریاست 12ویں جماعت کے نمبروں کی بنیاد پر میڈیکل کورسز میں داخلے کی اجازت دے۔ نیٹ لاگو ہونے سے پہلے میڈیکل کالجوں میں داخلے اسی طریقے سے ہوتے تھے۔کرناٹک حکومت کی طرف سے یہ فیصلہ ایسے وقت میں لیا گیا ہے جب نیٹ-یو جی امتحان میں مبینہ پیپر لیک کو لے کر پورے ملک میں ہنگامہ ہے۔ اگر یہ بل ریاستی اسمبلی سے منظور ہو جاتا ہے، تو طلباء کو کرناٹک کے میڈیکل کالجوں میں انڈرگریجویٹ اور پوسٹ گریجویٹ کورسز میں داخلے کے لیے ریاستی مسابقتی امتحان میں شرکت کرنا ہوگی اور انہیں نیٹ سے آزادی ملے گی۔ تاہم، یہ ابھی تک واضح نہیں ہے کہ نیٹ کی جگہ لینے والے امتحان کو کیا کہا جائے گا۔پچھلے مہینے دراوڑ منیترا کزگم (ڈی ایم کے) کی قیادت والی تمل ناڈو حکومت نے بھی نیٹ کے خلاف ایک قرارداد منظور کی تھی۔ ڈی ایم کے حکومت نے مرکز سے کہا تھا کہ وہ ریاستی حکومتوں کو میڈیکل کورسز میں داخلہ لینے کی اجازت دے۔ کئی علاقائی پارٹیاں بشمول مانیتھنیا مکل کاچی، مارومالارچی دراوڑ منیترا کزگم، تاملگا ویٹری کزگم اور کمیونسٹ پارٹی آف انڈیا (مارکسسٹ) نے بھی ڈی ایم کے حکومت کی تجویز کی حمایت کی۔ڈی ایم کے ایم پی کے کنی موزی نے خبر رساں ایجنسی اے این آئی سے بات کرتے ہوئے کہا، ’’تمل ناڈو مسلسل کہہ رہا ہے کہ ہمیں نیٹ نہیں چاہیے، اب یہ ثابت ہو گیا ہے کہ نیٹ ایک منصفانہ امتحان نہیں ہے اور اس کی وجہ سے طلباء کو کافی نقصان ہو رہا ہے۔ ہم چاہتے ہیں کہ نیٹ کو ختم کر دیا جائے اور صدر نے ابھی اس پر دستخط کرنا ہیں‘‘۔
