سویپ سرگرمیاں: لالچوک میں ووٹر بیداری پروگرام سولنہ میں بینر کاافتتاح،سوپور میں طلاب کی ریلی

 عظمیٰ نیوزسروس

سرینگر+سوپور// سنٹرل بیورو آف کمیونیکیشن، وزارت اطلاعات و نشریات، فیلڈ آفس سری نگر نے جمعہ کو گھنٹہ گھر، لال چوک سری نگر میں ایک بیداری پروگرام کا انعقاد کیا، تاکہ ووٹر بیداری کو فروغ دیا جا سکے اور انتخابی مہم میں فعال شرکت کی اہمیت کو اجاگر کیا جا سکے۔ سسٹمیٹک ووٹرز ایجوکیشن اینڈ الیکٹورل پارٹیسیپیشن پروگرام کے تحت منعقد ہونے والے اس پروگرام کا مقصد شہریوں کو شامل کرنا اور لوک سبھا کے جاری انتخابات کے دوران اپنے ووٹ ڈالنے کی اہمیت کو اجاگر کرنا تھا۔پروگرام میں مقامی کمیونٹی کی پرجوش شرکت دیکھی گئی، جو جمہوری اقدار کو برقرار رکھنے اور ووٹنگ کے حقوق کے استعمال کے مشترکہ عزم کی عکاسی کرتی ہے۔شرکاء کو معلوماتی لٹریچر فراہم کیا گیا جس میں جمہوری اصولوں کو مضبوط بنانے میں عوامی شمولیت کے اہم کردار کو واضح کیا گیا۔فیلڈ پبلسٹی آفیسر، سی بی سی سری نگر نے کہا کہ یہ پروگرام سنٹرل بیورو آف کمیونیکیشن، فیلڈ آفس سری نگر کے ذریعے منعقد کیے جانے والے پروگراموں کی ایک وسیع سیریز کا حصہ تھا، جو کشمیر کے پورے خطے میں باخبر شہریت کو فروغ دینے اور جمہوری شرکت کو تقویت دینے کے لیے پھیلا ہوا ہے۔اس دوران سٹیٹ ٹیکسز کمپلیکس سولنہ سری نگر میں ایک منفرد اَقدام کے تحت ووٹرز ایجوکیشن اینڈ الیکٹورل پارٹیسی پیشن (ایس وِی اِی اِی پی) کے سب سے بڑے بینر کا اِفتتاح کیا گیا جو شہریوں میں بیداری اور شہری شمولیت کو فروغ دینے میں ایک اہم پیش رفت ہے۔

 

ایڈیشنل کمشنر سٹیٹ ٹیکسز کشمیر شکیل مقبول نے بینر کا اِفتتاح کیا۔سٹیٹ ٹیکسز ڈیپارٹمنٹ کی قیادت میںسویپ( ایس وِی اِی اِی پی )پہل کا مقصد شہریوں کو ان کے اِنتخابی حقوق اور ذمہ داریوں کے بارے میں بااِختیار بنانا اور تعلیم دینا ہے۔سٹیٹ ٹیکسز کمپلیکس سولنہ سری نگرمیں نمایاں طور پر سجے اس یادگار بینر کے اِفتتاح کے ساتھ ہی مہم نے راہگیروں اورشراکت داروں کی توجہ مبذول کی ہے۔ایڈیشنل کمشنر سٹیٹ ٹیکسز کشمیر نے اَپنے اِفتتاحی خطاب میں جمہوری عمل میں فعال شرکت کی اہمیت اور جمہوریت کے تانے بانے کو مضبوط بنانے میں بیداری مہم کے کردار پر زور دیا۔اُنہوں نے اِس اَقدام کو حقیقت کا روپ دینے میں شامل تمام شراکت داروں کا شکریہ ادا کیا اور اِنتخابی خواندگی اور شرکت کے کلچر کو فروغ دینے کے لئے سٹیٹ ٹیکسز ڈیپارٹمنٹ کے عزم کا اعادہ کیا۔سری نگر میں سب سے بڑے سویپ بینرکے طور پر اس کی نقاب کشائی بیداری بڑھانے اور شہریوں کو اپنے جمہوری حقوق کو ایمانداری سے استعمال کرنے کے لئے متحرک کرنے کی سمت میں ایک یادگار قدم کی نشاندہی کرتی ہے۔ادھرلوک سبھاانتخابات میں ووٹروں کی زیادہ سے زیادہ شرکت کو یقینی بنانے کیلئے ووٹر بیداری مہم کی ایک کڑی کے طور پرجمعہ کو بائز ہائر سیکنڈری سکول سوپور میں سویپ پروگرام کے تحت ایک ریلی نکالی جس سے بارہمولہ حلقہ انتخاب کے لیے مقرر جنرل الیکشن اوبزرور دیپندر سنگھ کشوہ نے جھنڈی دکھا کر ریلی کو روانہ کیا۔یہ ریلی سوپور کے مین مارکیٹ سے ہوتے ہوئے سکول کے گیٹ پر اختتام کو پہنچی۔ ریلی میں شریک طالب علم ہاتھوں میں بینر اٹھائے ہوئے تھے جن پر ووٹ کے جمہوری حق اور اسکے فوائد متعلق نعرے درج تھے۔الیکشن اوبزرور نے اس موقعہ پر اسکول کے نوجوان طلبہ سے مختصر بات چیت کرتے ہوئے جمہوری اداروں کے استحکام کے لیے ووٹ کی اہمیت اجاگر کی۔