گاندربل//سنٹرل یونیورسٹی کشمیر میں شعبہ اسکول آف ایجوکیشن نے انڈین ریڈ کراس سوسائٹی سرینگر کے تعاون سے یہاں’’بچائو اور امداد ‘‘پر ایک روزہ تربیتی پروگرام کا انعقاد کیا گیا۔اس موقع پر خطاب کرتے ہوئے سنٹرل یونیورسٹی کشمیر کے وائس چانسلر پروفیسر فاروق احمد شاہ نے طلبا ء کو زندگی بچانے کی مہارتیں فراہم کرنے کی ضرورت پر زور دیا اور قدرتی آفات کے وقت معاشرے میں شہریوں کے کردار پر روشنی ڈالتے ہوئے انسانیت کو بچانے اور اس کی امداد کرنے کا جذبہ ہر شہری کے پاس ہوناچاہئے۔تربیتی پروگرام سے خطاب کرتے ہوئے شعبہ سکول آف ایجوکیشن کے سربراہ پروفیسر سید ظہور احمد گیلانی نے زندگی بچانے کی مہارتوں کے کردار پر روشنی ڈالتے ہوئے کہا کہ یہ عملی حصہ تعلیم سے غائب ہے۔انسانیت کی خدمت اور فلاح کے لئے ہر شہری کو ترجیحی بنیادوں پر کام کرنا چاہیے۔قدرتی آفات کے وقت کسی بھی شہری کی زندگی بچانا عظیم کام مانا جاتا ہے ۔انہوں نے یونیورسٹی کے ساتھ تعاون کرنے پر انڈین ریڈ کراس سوسائٹی سرینگر کا شکریہ ادا کیا۔ انڈین ریڈ کراس سوسائٹی کشمیر کے سیکرٹری محمد رفیع نے ریڈ کراس کا تاریخی پس منظر پیش کیا اور کشمیر میں 2005 کے زلزلے اور 2014 کے سیلاب کے وقت اپنے ذاتی تجربات سے شرکا کو روشناس کرایا۔انڈین ریڈ کراس سوسائٹی کشمیر کے سابق سکریٹری محمد شفیع راتھر نے وائس چانسلر سے درخواست کی کہ وہ طلبا ء کی قابلیت اور اوصاف کے مطابق رضاکاروں کے طور پر ریڈ کراس سوسائٹی تشکیل دیں۔تربیتی پروگرام کی نظامت کے فرائض ڈاکٹر محترمہ اسما نے انجام دیئے جبکہ ڈاکٹر مسعود الحسن نے شکریہ کی تحریک ادا کی۔
سنٹرل یونیورسٹی تربیتی پروگرام کا انعقاد
